Medio Ambiente realizará na provincia da Coruña o maior esforzo investidor de 2015

A Consellería de Medio Ambiente, Territorio e Infraestruturas realizará na provincia da Coruña o seu maior esforzo investidor do ano 2015, cun orzamento de 207,92 millóns de euros, cifra que representa un incremento dun 12% con respecto aos orzamentos de 2014 (185,47 M€). En termos de inversión por habitante, o incremento será de 20 euros, xa que se investirán 182,68 euros por cada cidadán da provincia da Coruña, mentres que o ano pasado se fixaban 162,14 euros.

Dos orzamentos de 2015 do departamento da Consellería destaca a partida en materia de estradas, que absorbe un importe global de 156 millóns de euros, é dicir un 75% do orzamento total para a provincia.

Neste capítulo hai que salientar o impulso que recibirá o o vindeiro ano a autovía da Costa da Morte, para a que se reservan 80 millóns de euros de fondos extraorzamentarios. Neste punto hai que destacar que a Lei de medidas fiscais e administrativas permite o desbloqueo da construción da infraestrutura, mantendo a aposta e priorización da execución e posta en servizo dentro desta lexislatura do treito comprendido entre Carballo e Baio, así como a variante de Baio. Tal e como se sinalou recentemente, é o tramo máis necesario dende o punto de vista do tráfico e, polo tanto, o treito máis eficiente e rendible e implica a posta en servizo de 27 novos quilómetros de vías de altas prestacións.

Tamén salienta a partida para as obras do soterramento da Marina, na cidade herculina (2M€), para os aparcamentos disuasorios da Coruña e Santiago de Compostela (1,65 M€) e para a Variante de Aradas no Concello de Compostela (0,63 M€). No 2015, a Xunta mantén o esforzo inversor en subvencións de peaxes, para o que reserva 1,96 M€, un millón máis que en 2014.

A mobilidade na provincia da Coruña seguirá a mellorar grazas aos investimentos que manexará a Dirección Xeral de Mobilidade, que centrará os seus esforzos no fomento do Plan de Transporte Metropolitano das áreas da Coruña, Santiago e Ferrol con 5,88 millóns de euros, así como nas obras do Plan Renove das Estacións de autobuses con 0,40 M€.

Augas de Galicia é o segundo departamento da Consellería de Medio Ambiente que manexará un maior orzamento en 2015, con 28 millóns de euros, dos cales 4,43 M€ se destinarán ás obras dos colectores xerais e da depuradora da Barcala, de Ribeira (3,93 M€), e do saneamento na zona norte da Ría de Ares e na zona de Ferrol (3,30 M€).

En materia de vivenda, os obxectivos de departamento que dirixe Ethel Vázquez centraranse no fomento de accións de rehabilitación de vivenda (3,58 M€) e de acceso ao aluguer de vivendas (2,96 M€), así como no desenvolvemento do parque residencial do Ofimático (3,48 M€). Este departamento da Xunta mobilizará un investimento total de 11,35 M€, é dicir 5 millóns máis que en 2014.

De xeito global, os restantes departamentos da Consellería de Medio Ambiente tamén rexistran un incremento dos orzamentos que manexarán ao longo de 2015. Así, a Secretaría Xeral de Ordenación do Territorio e Urbanismo mantén a súa aposta pola actualización do planeamento urbanístico dos concellos galegos con axudas por un valor de case un millón de euros e tamén pola mellora dos contornos urbanos, capítulo ao que destinará 0,68 millóns de euros.

En materia de conservación e medio ambiente, a Dirección Xeral de Conservación xestionará 1,36 M€ para as axudas aos concellos en Rede Natura 2000, a parques naturais e para a ordenación cinexética. As contas de 2015 tamén blindan orzamentos para acometer actuacións en puntos limpos, clausura de vertedoiros de residuos e limpeza de puntos de vertido incontrolado, así como para a clausura do vertedoiro das Fragas do Eume.