Máis de 70 marcas e 21 adegas protagonizaron en Oviedo unha presentación dos viños de Rías Baixas

Cata de viños Rías Baixas en Oviedo

Os viños da D.O. Rías Baixas protagonizaron unha presentación en Oviedo dirixida ao prescriptor asturiano (catadores, enólogos, distribuidores…), que tivo lugar onte no Hotel A Reconquista, unha iniciativa que contou coa participación de máis de 70 viños pertencentes a 21 adegas desta Denominación de Orixe e na que tomaron parte máis de 20 profesionais do sector.

Todos eles tiveron a oportunidade de degustar unha importante mostra dos viños que se elaboran nestes momentos na D.O. Rías Baixas, desde viños da anada 2013 a viños con crianza sobre leas, con madeira, seleccións de anada, espumosos, blends… Ademais, profesionais do sector asturiano participaron en dúas catas dirixidas por un técnico da D.O. Rías Baixas. A primeira delas foi de viños da D.O. Rías Baixas, na que avaliaron Rías Baixas Albariño, Rías Baixas elaborado en leas e Rías Baixas Barrica. Seguidamente, estes prescriptores puideron catar dúas augardentes, un branco e outro de herbas, e un licor café, todos eles coa súa correspondente contraetiqueta ao estar amparados polo CRIIGG Augardentes e Licores Tradicionais de Galicia.

Asturias, e en concreto Oviedo, é un mercado estratéxico para esta Denominación de Orixe. Segundo datos do informe Nielsen, os viños de Rías Baixas representan o 63,3% da cota da área 5 ou Noroeste (que inclúe Galicia, León e Asturias). Os viños con Denominación de Orixe Rías Baixas incrementaron a súa cota de mercado en volume até o 13,9% (T.A.M. Xaneiro’14) na canle da Hostalaría, onde o valor da cota de mercado destes viños atlánticos ascendeu ao 22%, mentres que a súa cota de mercado en volume foi do 7,2% en alimentación en 2013, o que en valor se traduciu nun 14,1%.

Tamén crecen as cifras de exportación desta Denominación, que xa vende a 60 países un 32% do seu viño cualificado. As cifras falan por si soas: cinco millóns e medio de litros, que se traduciron en 28 millóns de euros. Os principais destinos son Estados Unidos, Reino Unido, Alemaña, Porto Rico e México.