Louzán mostra a súa indignación e vergoña ante os casos de corrupción

O presidente provincial do Partido Popular en Pontevedra, Rafael Louzán, asegurou este martes sentir “a mesma indignación e vergoña que sente toda a sociedade galega e española” ante os casos de corrupción que se están destapando nos últimos días.

Louzán pediu o “máximo respecto” para a Xustiza e demandou “que todo se aclare de maneira rápida e que non se volvan a repetir situacións semellantes nunca máis”.

O tamén presidente da Deputación provincial realizou estas declaracións este martes á saída do acto de presentación do novo restaurante do Museo de Pontevedra.

“A dignidade das persoas que estamos todos os días nisto tamén se ve afectada”, comentou o presidente do PP de Pontevedra, que entende que noticias como as relacionadas coa ‘Operación Púnica’ provocan “desafección” e “dúbidas” que che levan a pensar moito se vale a pena estar neste ámbito. “Eu sinceramente creo que si”, confesou Rafael Louzán, convencido de que hai que estar na política “para tentar axudar a facer cousas e dar o mellor de ti”.

Neste sentido, Louzán rompeu unha lanza por aquelas persoas que, “de maneira honrada e comprometida co seu país e cos seus concidadáns, asumen responsabilidades políticas de maneira temporal”. “Quen entenda a política como unha profesión, está totalmente equivocado”, proclamou o mandatario popular.

CONTROL

A preguntas dos xornalistas, Louzán destacou que, ante a proliferación de casos de corrupción, deberíase potenciar o labor de fiscalización e control dos funcionarios, ser máis rigoroso na aplicación das normas e lograr a plena transparencia nas institucións públicas.

“Onte foi un día triste para toda a sociedade e tamén para cantos temos, nun nivel ou outro, responsabilidades na vida pública”, concluíu.