Hernández asegura que cando Currás decida o que vai facer tomará unha decisión

O alcalde de Santiago, Agustín Hernández, recoñeceu que non sabe se o seu predecesor no cargo, Ángel Currás, deixará a súa acta na corporación local, onde permanece como membro do seu equipo de goberno con dedicación exclusiva, e se desvinculou do seu futuro coa afirmación de que se trata dunha “decisión persoal” do edil responsable de Relacións Institucionais.

“Cando o señor Currás decida o que vai facer da súa vida, trasladará esa decisión ao alcalde, e nese momento o señor alcalde tomará a decisión que corresponda. Mentres, o señor Currás é un membro do grupo de goberno do Partido Popular do Concello de Santiago”, resolveu Agustín Hernández a preguntas dos xornalistas en rolda de prensa.

Hernández, que nos últimos días evitara valorar o posible destino de Currás como delegado de Tragsa en Galicia, afirmou este mércores que para el “non supoñen ningunha novidade” as palabras do presidente da Xunta, Alberto Núñez Feijóo, nas que sementou dúbidas sobre ese nomeamento. “Para min non supón ningunha novidade, xa que non teño relación con ese tema, nin é da miña competencia”, manifestou.

En varias ocasións Hernández quíxose desvincular absolutamente do futuro de Currás e afirmou que entre as súas preocupacións non está un hipotético relevo (habería que nomear un edil que non foi na lista, xa esgotada).

“O alcalde está pendente da aplicación do remanente, da celebración do próximo pleno ordinario, do pleno extraordinario, dos actos en relación coa axenda do alcalde, e organizar e dirixir o concello”, enumerou.

Desta forma, “insistiu” en que o futuro de Currás “é unha decisión” persoal, así como tamén unha hipotética renuncia á acta. “Dependerá de se é nomeado; se é nomeado, renunciará, e se non é nomeado, non renunciará”, indicou.

Agustín Hernández, que contestou que nin está “doído” nin deixa o de estar”, rexeitou ter novidades ao respecto do posible nomeamento de Currás por parte do seu concelleiro nin do propio presidente da Xunta, que este mércores, con motivo das preguntas que lle facía a oposición, sementou dúbidas sobre ese destino.

Publicamente, o número dous do partido, Alfonso Rueda, interpretara a saída de Ángel Currás do Concello compostelano como “o peche dunha etapa”. Non obstante, matizara que “se así fóra”, entendería o seu paso como “o peche dunha etapa” como concelleiro, igual que antes a finalizou como rexedor.

A opción de que Currás, dobremente imputado na Operación Pokémon e por suposto acoso a un policía local, se fixese cargo de Tragsa provocou duras críticas da oposición e entre os propios traballadores desta empresa pública.

“NON FIXEN NINGUNHA XESTIÓN”

O vicesecretario do PP galego e alcalde de Santiago insistiu en que el non fixo “xestións” sobre o futuro do seu concelleiro. “Non me transmitiron ningunha novidade (nos últimos días). Insisto en que eu non fixen ningunha xestión nin antes nin despois; se o presidente da Xunta di que non lle consta, pois non lle consta (o nomeamento)”, remarcou.

Ademais, á pregunta de se non considera que Feijóo lle tiña que transmitir novidades ao respecto de Currás se as tiña, Hernández contestou: “Pois non”.

Ao ser interpelado se dá por seguro que Currás deixará o Concello, respondeu: “Pois non o sei. Iso é unha decisión que ten que tomar o señor Currás, insisto”.

Agustín Hernández, que reafirmou o seu compromiso co Concello de Santiago, incidiu en que Tragsa “non depende” da Casa do concello, e dixo que non opina sobre posibles e non interpreta palabras, ás preguntas, respectivas, sobre o hipotético nomeamento e acerca de como entender as palabras de Feijóo.