Comeza a andar o Club de Lectura da Biblioteca de Vilagarcía con todas as prazas cubertas

A Concellería de Cultura, que dirixe Rocío Llovo, puxo onte en marcha o Club de Lectura da Biblioteca Rosalía de Castro cun notable éxito de participación, pois non só foron cubertas as 15 prazas previstas inicialmente, senón que hai alomenos dúas persoas anotadas en lista de espera. O proxecto comezou na tarde de onte co reparto dos exemplares do primeiro libro a ler: a exitosa novela de Paul Auster “Brooklyn follies”.

Os participantes na experiencia, que coordina o profesor Augusto Guedes -o mesmo que dirixe outra experiencia cultural, “Os martes, arte”-, terán quince días para ler aproximadamente a metade dos capítulos do libro. Logo, o 10 de novembro, luns, ás 19,30 horas, na sala de prensa do auditorio, volverán a reunirse todos para comentar o que teñen lido: a construcción dos personaxes principais (Nathan, Harry e Tom) e a análise de determinadas situacións e parágrafos. A partir desta charla, os membros do Club de Lectura terán outros quince días para rematar o libro e, trala posta final en común, retirar un novo libro.

Como se sabe, os exemplares dos libros a ler son cedidos temporalmente pola Biblioteca de Galicia, coa que chegou a un acordo a Concellería de Cultura.