Alemao e Tomás de Dios convértense nos primeiros embaixadores do Santiago Futsal

Presentación dos dous embaixadores do Santiago Futsal

Esta mañá tivo lugar na Sede de Down Compostela a presentación dos primeiros embaixadores do Santiago Futsal, figura que crea o club para recoñecer o labor de persoas destacadas do fútbol sala a favor do Santiago Futsal.

Os dous primeiros embaixadores son Julio César Simonato Cordeiro, máis coñecido pola afección compostelá como ‘Alemao’, xogador que fora capitán do Santiago Futsal e que formou parte do equipo durante 8 anos, co que gañou a Copa, a Recopa e a Supercopa de España; e Tomás de Dios, ex adestrador do Santiago Futsal e co que o club gañou a Supercopa de España no ano 2011.

Os dous primeiros embaixadores do club foron presentados ante os medios e en presenza do presidente do Santiago Futsal, Don Ramón García Seara e o presidente da Fundación Down Compostela, Juan Martínez. Ramón García fixo referencia ao especial da presentación, a que definiu como “a máis especial dos dous últimos anos, por presentar a dúas grandísimas persoas e por recoñecer deles o estreito vínculo que lles une ao club”. Destacou deles “a súa gran xenerosidade” como persoas que representan ao Club máis aló das fronteiras españolas.

Tomás de Dios quixo agradecer o que significa ser embaixador do Santiago Futsal “Ser mensaxeiro desta identidade é representar uns valores e unha identidade que exceden o ámbito deportivo, que valora a importancia dos xogadores como persoas antes que como futbolistas. É un modelo para outros clubs.”

Pola súa banda, Alemao, encomiou ao club do que xamais se esqueceu desde a súa marcha “É un orgullo que o club ao que quero me faga o seu embaixador. Agradezo a todo o persoal do club esta oportunidade, porque me gusta axudar ao Santiago Futsal sempre que podo e en todo o que podo. Eu sempre estarei á beira do Santiago Futsal e espero volver algún día a este club.”

Tras a presentación, Alemao entregou aos membros da Fundación Down Compostela un paquete de carnés de socios do Santiago Futsal, que o mesmo ex xogador doou á fundación para que todos aqueles que o desexen poidan asistir aos partidos. Tamén doou senllos paquetes de carnés a Cáritas e Cruz Vermella.