AGE defende reprobar a Feijóo porque loita contra o pobo e esmágao

A viceportavoz de Alternativa Galega de Esquerda, Yolanda Díaz, defendeu este xoves “reprobar” ao presidente da Xunta, Alberto Núñez Feijóo, porque “loita contra o pobo e esmágao”, e reclamoulle que “teña dignidade” e “mude de políticas” para “satisfacer as necesidades da maioría social”.

   Precisamente, AGE presentou unha iniciativa exposta como unha emenda á totalidade da xestión do mandatario autonómico á fronte da Xunta. Neste sentido, e no que constitúe o último día do debate de política xeral, Yolanda Díaz mencionou as medidas ante situacións de desafiuzamentos,  que tachou de “fracaso, fracaso e fracaso”.

   Yolanda Díaz recriminou ao presidente da Xunta que é “falso” que Galicia presente mellores indicadores económicos que a media estatal. “Non volva afirmar que a nosa situación é mellor, porque é falso”, salientou a deputada da coalición, apoiándose nos datos do paro e na existencia dun “10 por cento de pobreza enerxética”, entre outros exemplos.

   Para AGE, Feijóo ve o país desde a “bruma” de Monte Pío, onde se sitúa a residencia oficial do presidente da Xunta, e non lle contan o país real” que hai máis aló desas paredes. “Coas súas políticas, non temos futuro, hai que redistribuír a riqueza”, sinalou.

“NON HAI DEMOCRACIA”

  “Porque loita contra o pobo e esmaga á poboación, merece saír desta Cámara, polo que fixo”, sentenciou Yolanda Díaz, quen nas primeiras palabras da súa intervención advertiu: “Non hai democracia”.

   “Deron un golpe de estado á democracia, deron un golpe de estado contra a xente común, por iso AGE quere reinventar a democracia, radicalizar a democracia”, aseverou Yolanda Díaz.

   Así, e tras incidir en que Alternativa Galega de Esquerda “quere reinventar a democracia, e que a xente do pobo teña voz e teña pan, e teña teito e tamén dereito a rosas (Ken Loach)”, reclamou a “derrogación de normas que están criminalizando” aos cidadáns”.

   Entre elas, citou o artigo 135 da Constitución, porque constitúe unha “soga” para “condenar” á fame aos traballadores deste país.

“O PRESIDENTE DOS 10.000 MILLÓNS”

      Durante a súa intervención, Yolanda Díaz recriminou ao mandatario galego que é o “presidente dos 10.000 millóns de euros, 100 millóns ao mes, a razón 10 millóns de euros diarios”, polo incremento da débeda.

   “Sabe cantos floteles poderíanse construír? 60 floteles”, espetoulle, Yolanda Díaz, ao mandatario autonómico, antes de desmentir, en función do antes devandito, que Feijóo sexa o presidente da “solvencia”. “Case triplicou a débeda!”, reprochou.

   Na súa exposición, Díaz recriminou a “precarización” dos contratos que levará a formación dual e reivindicouse como “os do Non” para asegurar que AGE lles di non ás auténticas miserias” que se pagarán por este tipo de traballos, do 80 por cento do salario mínimo interprofesional.

   Tamén considerou unha “indecencia” que a proposta para os maiores de 45 anos “fáganse autónomos”. “Dicir que fagan autoemprego* É condenalo á miseria”, reprochou Yolanda Díaz, que tamén demandou “banca pública” para que  os dirixentes “deixen de facer negocio” e un salario mínimo para todos os cidadáns.

   Entre outras cuestións, Yolanda Díaz tamén se reafirmou no “non” á actual política enerxética e reclamou o peche das centrais térmicas, coa recolocación dos seus traballadores, e a saída de ENCE da ría de Pontevedra.

   “E queremos unha comisión de investigación de Angrois”, agregou, antes de remarcar que AGE quere “un país decente”. “E lamentablemente non o temos”, apostilou.