A Escola de Organización Industrial prevé investimentos na provincia de Pontevedra por 6 millóns de euros

A fundación Escola de Organización Industrial (EOI) prevé investimentos por valor de ata 6 millóns de euros na provincia de Pontevedra a través de diferentes programas, actividades e actuacións que se desenvolverán en colaboración coa Deputación de Pontevedra no período 2015-2017.

Así se recolle nun acordo asinado entre as dúas institucións, no que se recolle o compromiso da EOI de realizar estes investimentos no caso de que dispoña de fondos suficientes e de que poidan establecerse accións cofinanciadas con cargo ós Fondos de Desenvolvemento Rexional ou ó Fondo Social Europeo.

Os investimentos concretaranse por medio de convenios específicos entre a Deputación de Pontevedra e a EOI, similares ós que se desenvolven na actualidade e que permitiron a organización da bolsa de contratación turística Travel Book Experience ou a realización de diferentes cursos para emprendedores.

O acordo entre a Administración provincial e a EOI subliña que as actividades que se desenvolvan na provincia irán orientadas a cumprir cos obxectivos do programa Europa 2020: promoción do emprego, incremento do investimento en I+D, medidas de control do cambio climático e de sustentabilidade enerxética, mellora da educación e loita contra a pobreza e a exclusión social.