Un total de 900 persoas participaron nas visitas guiadas ás baterías do Monte de San Pedro

O Concello da Coruña, a través da área de Medio Ambiente que dirixe Enrique Salvador, informa de que ao redor de 900 persoas, visitaron, a través do programa de visitas guiadas, as baterías do Monte de San Pedro desde a súa posta en marcha a mediados de xuño até o 31 de agosto. Outras 1.800 persoas visitaron, ademais, o Centro de Interpretación.

Desde o pasado 17 de xuño os cidadáns poden visitar, grazas aos traballos de restauración e acondicionamento realizados polo Concello, o Museo-Centro de Interpretación, o telémetro, a sala do posto de observación, a sala de dirección de tiro e a peza exterior leste, o que lles permite comprender mellor o que supuxo este sistema de defensa da cidade.

O programa de visitas guiadas para grupos está pensado para un máximo de 15 persoas en horario de mañá de 11.00 a 14.00 horas e de tarde de 16.00 a 19.30 horas. É necesario pedir cita previa a través do 010, as oficinas de turismo ou o mail concejalia.medioambiente@coruna.es. Realízanse todos os días excepto o luns. Ademais, os martes e domingos só abre polas mañás.