Tono Campos proclámase campión do Mundo de Maratón

Tono Campos proclamouse campión do Mundo de Maratón na modalidade de C-1 e confirmou os prognósticos que lle colocaban como un dos grandes favoritos para lograr a medalla de ouro. O outro representante galego, David Mosquera, finalizou no cuarto lugar, quedou a menos dun minuto da medalla de bronce nunha regata de máis de dúas horas de duración.

O padexeiro do Breogán do Grove cumpriu o seu primeiro obxectivo en Oklahoma. A súa veterenía, experiencia e tamén o seu estado de forma foron condicionantes para unha regata de máis de trinta quilómetros e sete porteos, é dicir, pasar por terra.

Xa nas primeiras voltas formouse un grupo de catro padexeiros que se xogarían as medallas. Tono Campos foi o que mellor dosificou as forzas para lanzar un ataque demoledor despois do último porteo. Só lle puido seguir o húngaro Marton Kover, que quedou a 19 segundos do galego.

Máis tarde, a un minuto e medio, terminou o portugués Nuno Barros, tamén considerado como un dos favoritos. David Mosquera mantívose sempre no grupo de cabeza, pero tamén cedeu ao final debido ao gran esforzo físico realizado.

A última xornada do Campionato do Mundo de Maratón será este domingo coas regatas de barcos dobres. Tono Campos volverá competir xunto a José Manuel Sánchez en busca da súa medalla de ouro. Tamén Iván Alonso xunto a Emilio Merchán parten como favoritos.