Rey Varela visita as obras do novo comedor escolar do centro educativo de Ponzos

Rey Varela na visita ás obras

O alcalde de Ferrol, José Manuel Rey Varela, visitou esta mañá as obras do novo comedor escolar do Centro de Educación Infantil e Primaria (CEIP) Ponzos. O primeiro edil percorreu as instalacións acompañado polo xefe territorial da Consellería de Educación e Ordenación Universitaria, Indalecio Cabana Leira; e a concelleira de Educación, Susana Martínez Galdós.

Jose Manuel Rey agradeceu a colaboración e esforzo da Xunta de Galicia para realizar investimentos nos centros escolares de Ferrol, ao tempo que destacou as obras do novo comedor do CEIP Ponzos. O rexedor municipal resaltou a coordinación entre as dúas Administracións “para mellorar os nosos centros educativos xa que é invertir en futuro”. Así mesmo, lembrou que os ferroláns poden solicitar as becas de comedor escolar para o curso 2014-2015.

Servizo de catering en comedores escolares

Por outra banda, a Xunta de Goberno Local deu hoxe luz verde á adxudicación do servizo de catering e do persoal monitor/coidador de comedor escolar para os Centros de Educación Infantil e Primaria (CEIP) do Concello de Ferrol á empresa Villasenín S.A. A Concellería de Educación, que dirixe Susana Martínez Galdós, destinará a dita contratación un importe máximo de 106.283,8095 euros (10% de IVE engadido) para o curso escolar 2014-2015.

Jose Manuel Rey sinalou que “Ferrol conta con servizo de comedor en oito centros escolares, e se ampliará a nove coa incorporación do novo comedor no CEIP Ponzos”. Ademais, o primeiro edil da cidade salientou que o servizo de catering e monitores repartirá 500 xantares e 150 almorzos.