Ponte Caldelas reabre o prazo de inscrición nas escolas deportivas

O Concello de Ponte Caldelas, do mesmo xeito que fixera por primeira vez en 2013, abre o prazo de inscrición para participar nas escolas deportivas durante este curso que se comezarán a impartir no municipio a partir do próximo mes de outubro. Con esta iniciativa preténdese que nenos e mozos poidan instruírse na práctica de deportes como o tenis, a ximnasia acrobática e o taekwondo. Estas tres actividades foron as que durante 2013 conseguiron o mínimo de participantes requiridos para a súa posta en marcha, e que agora cumprirán o seu segundo ano de funcionamento. Outras modalidades deportivas non chegaron a porse en marcha por falta de alumnos, como fútbol sala e baloncesto.

A disposición do renovado pavillón de deportes municipal favorece que desde o Concello de Ponte Caldelas se impulse a creación dunha maior oferta formativa xa que as novas instalacións permiten unha práctica adecuada destes deportes, dos que até agora era moi difícil garantir a súa continuidade.

Para desenvolver este proxecto formativo cara aos máis xóvenes o Concello chegou a acordos con clubs do municipio e do veciño de Pontevedra co fin de que sexan os encargados de xestionar e dirixir as escolas deportivas.

As escolas comezarán a funcionar no mes de outubro e poderán inscribirse, coa súa ficha e seguro federativo, nenos e nenas con idades a partir dos 5 anos para a de tenis. No caso da escola de ximnasia acrobática as idades dos que poderán participar serán as comprendidas entre os 4 e os 14 anos, mentres que en taekwondo será de 6 a 11.

A colaboración da Deputación de Pontevedra e do propio Concello de Ponte Caldelas favorecerán que as cotas que teñan que abonar os inscritos sexan moi económicas con relación á tarifa habitual. Así, os alumnos da escola de tenis, terán a posibilidade de asistir 2 días á semana con horarios distribuídos os mércores (de 15:45 a 17:45 horas) e venres de 17 a 21 horas polo que a cantidade que terán que abonar irá en función do tempo que empreguen.

Polo que respecta á ximnasia, esta impartirase durante 2 días á semana (os martes e xoves de 16:30 a 17:30 horas) e o seu custo será de 15 euros ao mes, ademais de 30 euros en concepto de ficha.

Os alumnos de taekwondo acudirán dous días á semana a esta actividade (os luns de 17 a 19:15 horas e os mércores de 18 a 19:30 horas), cun custo mensual de 10 euros.

O formulario para realizar a inscrición poderase descargar da páxina web do Concello (www.pontecaldelas.org) aínda que deberán entregarse nas oficinas municipais habilitadas para tal fin no Consistorio.

Con esta iniciativa o Concello pretende fomentar a práctica de actividades saudables á vez que se fomentan valores humanos como o compañeirismo, a solidariedade e o traballo en común.

Neste proxecto deportivo-formativo do Concello de Ponte Caldelas colaboran o Club de Tenis Ponte Caldelas, o Club Treboada Ximnasia e a Federación Galega de Taekwondo-Escola Deportiva dá Deputación de Pontevedra.