Enviar a un amigo
Opinar
ImprimirPilar Cancela descoñece que figure entre as sondaxes do PSOE como alcaldable en Santiago
A secretaria de organización do PSdeG, Pilar Cancela, afirmou non ter “nin idea” de que o seu nome figura entre as sondaxes do PSOE como alcaldable en Santiago. “Non tiña nin idea de que o meu nome estaba nas enquisas”, afirmou, a preguntas dos xornalistas.
Así, en rolda de prensa, declinou pronunciarse sobre este extremo, ao igual que evitou responder á pregunta de se comparte as declaracións do profesor universitario Jaime Barreiro acerca dos dous nomes -Paco Reyes e Mercedes Rosón- que polo momento confirmaron que pugnarán pola candidatura nesta cidade.
“Non escoitei as declaracións do compañeiro Jaime Barreiro, pero non vou facer ningún comentario ao respecto”, limitouse a contestar, despois de pedir desculpas por non facer máis valoracións esta xornada sobre temas orgánicos. “Adoito contestar, pero hoxe non”, dixo, algo que xustificou pola relevancia do asunto da campaña que presentaron este xoves os socialistas, contra a violencia de xénero.
O PSOE iniciou hai 10 días as súas enquisas nas cidades para coñecer as preferencias dos veciños sobre os posibles candidatos ás eleccións municipais do próximo mes de maio. En Santiago, segundo informaron fontes socialistas, ademais da única que ata o momento anunciou que concorrería ás primarias, a concelleira Mercedes Rosón, e o que se prevía o seu principal opoñente, Paco Reyes, o actual voceiro municipal, figuran outros tres nomes: Xoaquín Fernández Leiceaga, Pilar Cancela e Joaquín Barreiro.
RAMA: “SON PERSOAS MOI VÁLIDAS”
Pola súa parte, cuestionado ao respecto nunha comparecencia anterior, o concelleiro socialista Bernardino Rama expresou a súa discordancia con Barreiro. “As dúas persoas que deron o paso son persoas moi válidas”, manifestou, antes de reiterar que el apoiará a Paco Reyes, actual voceiro socialista no Pazo de Raxoi.
A liña seguido, dixo que é “lóxico e razoable” que se inclúan “outros nomes” nas enquisas, pois estas serven para “pulsar como está o partido” e analizar tamén a opinión da cidadanía sobre outras formacións.
