Os populares denuncian que os novos graos da UNED de Vigo non se iniciarán no auditorio

O Grupo Municipal do PP denunciou este mércores que os novos graos que impartirá a UNED en Vigo non poderán iniciar o curso no Auditorio Mar de Vigo, tal e como anunciara o alcalde, Abel Caballero.

O concelleiro do PP Roberto Relova lamentou que esa promesa é “outra máis que incumpre” o rexedor quen, lembrou, “dixo literalmente que os novos graos empezarían o 1 de setembro no auditorio”. “A idea desinflouse”, sinalou Relova.

O edil popular apuntou que os responsables da UNED estarían de acordo con que os graos se impartisen no auditorio, pero non souberon “nada” tras o anuncio do alcalde, porque non se lles confirmou esa localización, nin se visitaron as instalacións nin se fixo a eventual adecuación das instalacións para impartir eses graos.

Relova pediu ao alcalde que se tome as cuestións da Educación “con máis respecto”, e pediulle “máis rigor e xestión” e anuncios “máis serios e rigorosos”.