publicidade hoxe

Os padexeiros galegos logran seis medallas no Campionato do Mundo de Maratón en Oklahoma

PUBLICADO EN: Noticias de GaliciaDeportesDeportes Portada
A-
A+

Os padexeiros galegos lograron seis medallas no Campionato do Mundo de maratón que se disputou en Oklahoma. Tono Campos foi campión en C-1 e segundo en C-2 xunto a José Manuel Sánchez. Iván Alonso logrou a prata en K-1 e o bronce en K-2 xunto a Emilio Merchán. Nesta especialidade, Álvaro Fernández Fiuza con Walter Louzán foron segundos. Óscar Graña e Ramón Ferro terminaron terceiros en C-2.

Iván Alonso non puido con Hank Mc Gregor, que se impuxo en K-1. O tudense tentouno todo, pero o surafricano foi o máis rápido despois do último porteo. O padexeiro do Kaiak Tudense foi segundo, mentres o portugués José Ramalho ocupou a terceira posición e o francés Cyrile Carre foi cuarto. Estes padexeiros mantiveron unha forte loita durante toda a regata e todos eles chegaron a ser líderes nalgún momento.

Iván Alonso tivo dificultades nalgúns tramos, pero superounos ao asegurarse unha boa posición para palear. Ao final non logrou o seu obxectivo, pero a medalla de prata pode considerarse como un gran éxito. Foi o mesmo resultado que logrou o ano pasado en Copenhague.

O tudense competiu tamén en K-2 xunto a Emilio Merchán. Nunha intensa regata, con catro embarcacións loitando polos tres primeiros lugares, todo decidiuse nos últimos metros. Hank Mc Gregor e Jasper Mocke, de Sudáfrica, foron superiores e aguantaron a presión das súas adversaros. Álvaro Fernández Fiuza e Walter Louzán foron segundos por escasa marxe ante Iván Alonso e Emilio Merchán, que o tentaron até o último metro. O tudense lograba a súa sexta medalla nun Campionato do Mundo na súa carreira deportiva e non puido revalidar o título logrado o ano pasado.

Tono Campos e José Manuel Sánchez lograron a medalla de prata en C-2, mentres Óscar Graña e Ramón Ferro foron terceiros. Os galegos non puideron con Adam Docze e Marton Kover, que lograron o triunfo de forma cómoda. Os húngaros dominaron a regata e impuxéronse con máis dun minuto e medio de vantaxe. Tono Campos, que se proclamou campión do Mundo en C-1, realizou un gran desgaste neste campionato.

Pola súa banda, Ramón Ferro e Óscar Graña entran a formar parte da historia. É a súa novena medalla nunha competición mundialista, algo ao alcance de moi poucos.

O Campionato do Mundo de maratón é a última competición importante da tempada internacional. Os galegos volveron ser protagonistas. Ademais das medallas, David Mosquera foi cuarto en C-1, mentres Damián González logrou o mesmo posto en C-1 júnior.

28 de setembro de 2014 | 22:52 • Sen comentarios

Comentarios pechados.