Os afeccionados do Rio Natura Monbus Obradoiro poderán adquirir nas oficinas do club as entradas para a Copa Galicia

O Pazo dos Deportes de Lugo acollerá o próximo 13 e 14 de setembro a Fase final da XXIX edición da Copa Galicia Sénior Masculina, que reunirá aos mellores equipos do baloncesto autonómico. Ribeira Sacra Breogan, Leyma Basquet Coruña, Xuventude Cambados, Club Ourense Baloncesto e Rio Natura Monbus Obradoiro serán os cinco equipos que participarán na disputa polo primeiro título oficial da tempada.

As entradas ou abonos para os afeccionados de Rio Natura Monbus Obradoiro que desexen asistir á fase final poderán ser adquiridas nas oficinas do club santiagués durante os días 11 e 12 de setembro (de 10 a 14 horas e de 17 a 21 horas) e terán un prezo de 10 euros por xornada (semifinais ou final) e 15 euros o abono para ambas. O prezo para os infantís (entre 6 e 18 anos), é de 8 euros por xornada e 10 euros o abono.

Os cinco equipos competirán baixo un sistema decidido previamente por sorteo e que estipula a presenza directa do Rio Natura Monbus Obradoiro, Ribeira Sacra Breogán e Leyma Basquet Coruña en semifinais. Por outra banda, Xuventude Cambados e COB terán que verse as caras nun encontro precedente en busca da praza de semifinais que resta por coñecer.

Ribeira Sacra Breogan – Leyma Basquet Coruña protagonizarán a primeira das semifinais o sábado 13 de setembro, ás 18.00 horas. Pola súa banda, ese mesmo día a continuación, o Rio Natura Monbus Obradoiro enfrontarase ao vencedor do Xuventude Cambados – COB a partir das 20.15 horas.

Na xornada seguinte, domingo 14 de setembro, a final que dilucidará o campión da XXIX Copa Galicia Sénior Masculina disputarana os gañadores de ambas as semifinais, a partir das 13.00 horas.