Os adestradores da Sociedade Ximnástica fórmanse no seu deporte

Comezou en Santiago de Compostela o curso de adestrador de atletismo de Nivel II, o denominado “Adestrador de Club” e que é o chanzo previo para o curso de adestrador nacional de atletismo.

Preto dunha trintena de adestradores galegos de atletismo acudiron á Residencia O Burgo de Santiago para recibir as primeiras leccións da materia a impartir e que se irá debullando, durante os fins de semana, ao longo destes últimos meses de 2014.

Como novidade impartiuse por primeira vez unha clase de atletismo adaptado, para que os adestradores teñan recursos para afrontar a preparación de atletas con deficiencias locomotoras, sensoriais e mentais; algo que está a empezar a ser demandado pola nosa sociedade.

Dous monitores da Escola de Atletismo da Sociedade Ximnástica, Jesús Cortegoso e Francisco Juncal estiveron en Santiago para ampliar a súa preparación de cara a formar mellor aos futuros atletas dos equipos absolutos da entidade pontevedresa.

O próximo fin de semana continuarán as clases e esta vez na pista de atletismo da Universidade de Santiago de Compostela.