Oroso inviste 50.000 euros en melloras nos centros educativos do municipio

O Concello de Oroso ten acometido durante as últimas semanas unha serie de melloras nos distintos centros educativos do municipio, nas que investiu máis de 50.000 euros. Uns traballos especialmente intensos no antigo CEIP de Sigüeiro, onde se arranxou o tellado, se cambiaron as fiestras dos teitos e se pintaron tanto a fachada principal como algunhas aulas de infantil e de primaria. Ademais, os obreiros municipais realizaron diversos traballos de albanelería e de fontanería no centro.

No IES de Oroso acometéronse actuacións de reparación e mellora en cuestións de albanelería e de fontanería, mentres que nas escolas unitarias se acometeron traballos de mantemento, pintado, electricidade e fontanería. Mención especial merece a escola unitaria de Vilacide, onde o Concello de Oroso acondicionou un patio de xogos e instalou un parque infantil.