O Partido Popular defende a contundencia da Xunta contra a decisión de Navantia

O voceiro parlamentario do PPdeG, Pedro Puy, defendeu este luns, fronte ás dúbidas da oposición, que a Xunta está a ser “extremadamente contundente” ao cuestionar a decisión de Navantia de derivar o estaleiro de Porto Real (Cádiz) parte da construción do buque flotel encargado por Pemex.

“Creo que a Xunta está a ser extremadamente contundente ao cuestionar unha decisión que non entendemos”, remarcou o voceiro popular, quen aludiu ao “esforzo” que supuxo traer “carga de traballo” para os estaleiros galegos.

Dito isto, defendeu que logralo débese a un “magnífico traballo” do presidente galego, Alberto Núñez Feijóo, polo que “o lóxico” é que o flotel se realice “integramente en Galicia”.

Dito isto, e tras insistir en que a decisión de Navantia “está mal” e debe reconsiderala, sinalou que sería “bo” contrastar “o que dixo a oposición cando se conseguiu esta carga de traballo para Ferrol” coas manifestacións que realizan agora os rivais políticos dos populares.

TAXA DE REPOSICIÓN

Por outra banda, no marco de debate dos Presupostos Xerais do Estado (PGE) de 2015, Puy considerou “unha magnífica noticia” a decisión estatal de que a taxa de reposición en persoal do estado encargado de servizos esenciais pasará o próximo ano do 10 por cento dos últimos anos ao 50 por cento.

O voceiro do PPdeG remarcou que se consideran servizos esenciais a educación, a sanidade, as forzas de seguridade e orde pública, así como o control e loita contra a fraude fiscal, ao tempo que constatou a “satisfacción” dos populares galegos con que se eleve a taxa de reposición nestes ámbitos.