O musical ‘Moulin Rouge’ interpretado por alumnos do IES Taboada Chivite chega ao Pavillón de Deportes de Verín

Máis de cen alumnos/as do IES Taboada Chivite de Verín, coa colaboración do Concello de Verín, representarán os días 12 e 19 de setembro, no Pavillón Municipal de Deportes da localidade, o musical ‘Moulin Rouge’.

Devandito musical, realizado integramente por estudantes e profesorado deste centro educativo verinense, xa foi presentado no propio instituto nos pasados meses; pero co obxecto de aproximalo a todos/as os/as veciños/as do municipio, o Concello de Verín cedeu esta instalación municipal, así como os medios técnicos, para a súa representación pública e gratuíta durante esas dúas xornadas. A primeira sesión será o 12 de setembro, ás 19 horas, e está destinada ao público en xeral; mentres que a segunda será unha semana máis tarde, o 19 de setembro, ás 10.30 horas tamén para o público en xeral e estudantes dos centros educativos de toda a comarca.

O espectáculo musical ‘Moulin Rouge’ naceu no pasado curso 2013-2014 da man de alumnos/as de 3º e 4º de ESO e 1º de Bacharelato, combinando escenas teatrais -escritas polo alumno Pedro Taboada, de 1º de Bacharelato-, catorce cancións -entre solos e coros-, cinco coreografías -creadas e dirixidas por Iria Otero Ferreira- e dúas aberturas instrumentais interpretadas por alumnos/as do IES Xesús Taboada Chivite. Neste novo proxecto, de dúas horas de duración, engadíronse máis elementos como escenografía -ideada por Javier Rodríguez García-, decorados -realizados por Rosa Limia, alumna de 1º de Bacharelato, e o Javier Díaz Blanco-, vestiario -con traxes elaborados pola profesora Esther Riva-, publicidade e cartelería -realizada por Javier Díaz e os seus alumnos/as de Plástica-; así como un muíño de luces e motor a cargo dos profesores da sinatura de Tecnoloxía.

Con todo, non se trata do único proxecto musical desenvolvido polo centro educativo verinense, xa que durante o curso 2012-2013, un total de 116 alumnos/as de 3º e 4º de ESO prepararon e representaron o musical ‘Los Miserables’, conformado pola escenificación de dez cancións, música e actuacións en directo. Unha experiencia que lles permitiu desenvolver, durante o curso 2013-2014, unha xira por institutos nas localidades de Xinzo de Limia e Porriño e a cidade de Vigo.