O BNG local considera moi grave o silencio de Caballero sobre os supostos enchufes

O Grupo Municipal do BNG no Concello de Vigo cualificou como “moi grave” que o alcalde da cidade, Abel Caballero responda con “silencio” ás acusacións políticas de casos de enchufismo e contratacións irregulares, e pediu “que se investigue a todo o mundo”.

Así o manifestou a portavoz nacionalista, Iolanda Veloso, quen lembrou que o seu grupo xa pediu explicacións ao rexedor publicamente. Segundo engadiu, se as acusacións non son fundadas, “que diga claramente que non existen esas situacións, que é falso, ou que poña unha denuncia por difamación”.

A concelleira do BNG defendeu que se actúe “con transparencia” e, por iso, pediu “que se investigue a todo o mundo”. “O BNG responde do que fixo cando estaba no goberno local”, sinalou, á vez que pediu que “quen teña documentación e probas, que denuncie, e que se investigue. E o alcalde, que responda”.

Iolanda Veloso fixo estas consideracións nunha rolda de prensa convocada para falar do inicio de novo curso político. A ese respecto, avanzou que o seu grupo “seguirá facendo oposición”, en vista de que “o PP non a fai”, e volverá esixir ao goberno local que solucións os “problemas prioritarios”, que son os relacionados co emprego e os servizos sociais.

A edila nacionalista lamentou que “o suposto gran pacto por Vigo”, en alusión ao acordo entre PP e PSOE para aprobar os orzamentos, non serviu para solucionar eses problemas, senón que a única finalidade que tiveron tanto socialistas como populares é a obtención de réditos electorais.