Mañá comeza o prazo de presentación de candidaturas para o pleno da Cámara de Ferrol

Mañá ábrese o prazo para presentar candidaturas para a Cámara de Ferrol, segundo a resolución da Dirección Xeral de Comercio que publica hoxe o Diario Oficial de Galicia mediante a cal se convocan as eleccións para a renovación do pleno do ente.

Tal e como se indica nesta publicación, tanto as candidaturas elixibles por sufraxio do electorado como as listas das candidaturas correspondentes aos representantes das organizacións empresariais máis representativas deberán presentarse durante os próximos 15 días, ata o vindeiro 2 de outubro.

O pleno da Cámara estará composto por 29 membros, dos cales 25 serán elixidos polo electorado, mentres que as organizacións empresariais escollerán 4 representantes. A elección dos vogais mediante votación terá lugar o vindeiro 4 de novembro de 2014, data no que os colexios electorais permanecerán abertos entre as 9:00 e as 21:00 horas, mentres que a elección dos vogais elixidos polas organizacións empresariais terá lugar o 12 de decembro de 2014, entre as 13 e as 14 horas. Os electores que prevexan que nas data das eleccións non poidan comparecer nos colexios electorais poderán exercer o seu dereito ao voto emitíndoo por correo.

Tal e como se ten comunicado, en cumprimento dos cambios normativos, vaise ter en conta un censo universal, do que forman parte todas as empresas da demarcación dadas de alta no imposto de actividades económicas (IAE) a 1 de xaneiro de 2014.