Máis de 500 atletas participarán na carreira “10 quilómetros Xornadas Marisqueiras do Berbés”

O Porto Pesqueiro de Vigo acollerá o vindeiro domingo, día 14 de setembro, a 5ª edición da carreira “10 quilómetros Xornadas Marisqueiras do Berbés” na que participarán máis de medio milleiro de atletas.

Segundo explicou esta mañá en rolda de prensa o Presidente da Autoridade Portuaria de Vigo, Ignacio López-Chaves, a carreira arrincará ás 10 da mañá e os atletas deberán dar dúas voltas a un circuíto de 5 quilómetros percorrendo un total de 10 quilómetros. Tanto a saída como a chegada, terá lugar á beira da empresa Viveros de Vigo, organizadora deste evento xunto ao recoñecido atleta vigués Carlos Adán.

O prazo de inscrición conclúe mañá xoves. Participan tanto atletas federados como non federados, aínda que a clasificación será conxunta.

A retirada de dorsais: terá lugar o sábado 13 de setembro, en horario de 18:00 a 21:00 horas, e o domingo, 14 de setembro, de 08:00 a 09:30 horas.

A festa do marisco

A carreira coincidirá coa celebración das XII Xornadas Marisqueiras VigoMar 2014, que terán lugar do 11 ao 14 de setembro e na que os asistentes poderán degustar máis de medio centenar de toneladas de produtos do sector pesqueiro e marisqueiro da cidade nun total de 48 variedades con prezos alcanzables para todos os petos.

A organización espera a asistencia dunhas 60.000 persoas, que poderán degustar os máis de 50.000 quilos de marisco que se porán á venda durante os catro días que durará esta festa gastronómica.

Ademais das degustacións, a organización previu diversas actividades paralelas, como sesións de baile, actuacións folclóricas e de grupos de animación, inchables e xogos tradicionais.

A inauguración oficial das XII Xornadas Marisqueiras terá lugar mañá xoves, día 11 de setembro, ás 13.00 horas. A lectura do pregón correrá a cargo do adestrador do R.C. Celta de Vigo, Eduardo Berizzo.