López-Chaves defende a importancia do Porto de Vigo para a economía galega e española

O Presidente da Autoridade Portuaria de Vigo, Ignacio López-Chaves, defendeu esta mañá a importancia do Porto vigués para a economía galega e española e, este sentido, asegurou que “se Vigo non existise, Galicia tería a necesidade de crealo”.

Segundo asegurou en rolda de prensa, o valor industrial das mercadorías embarcadas e desembarcadas a través dun Porto é diferente segundo o tipo de mercadoría do que falemos, como sucede no caso dunha tonelada de cemento, cuxo prezo medio é de 67 €/tonelada, mentres que o prezo medio dunha tonelada de pezas auto é de 9.800 €/tonelada ou o da tonelada de medicamentos, que alcanza os 28.000 €/m3. “Pesan o mesmo, pero o seu valor é moi distinto”, subliñou. Tanto é así que “un Porto que movese 10 toneladas de cemento, estaría posicionado 10 veces máis que un que movese unha soa tonelada de pezas auto”, recalcou, “a pesar de que o valor desas 10 toneladas de cemento suporía 670 € e o de 1 soa tonelada de pezas auto 9.800 €, é dicir, 15 veces máis que a anterior”.

Vital para a economía española

En canto ao valor das mercadorías exportadas a través do Porto de Vigo, López-Chaves lembrou que en 2013 superaron os 6.600 millóns de euros, o que demostra que o Porto de Vigo é “vital” para a economía non só galega, senón tamén española.

Como exemplo, explicou que, de acordo coas estatísticas provisionais de Comercio Exterior do pasado exercicio, as exportacións a través da rada viguesa foron semellantes ás realizadas polo conxunto de España vía ferrocarril e mesmo Vigo exportou case tanto como doce provincias españolas con máis de 4.100.000 habitantes.

Entre outros datos que achegou o máximo responsable portuario para defender a importancia do valor das mercadorías, asegurou que o valor das mercadorías exportadas a través da terminal olívica foi case o dobre das exportacións do conxunto do Principado de Asturias e mesmo superaron o valor das exportacións realizadas a través de tres Comunidades Autónomas, como é o caso de Canarias, Estremadura e Cantabria.

Respecto doutros países, López-Chaves apuntou que a través de Vigo exportouse o 11% do total das exportacións de España a Bélxica, o 10,5% a Alxeria, e o 22% a Chile, o que, ao seu xuízo, “dános unha visión do peso económico do Porto de Vigo nas exportacións do conxunto de España”.

En canto ao tipo de mercadoría, o Presidente portuario destacou o tráfico de pesca conxelada que, ao longo de 2013, supuxo o 41% do total das importacións de España, así como o sector da automoción, no que o 70% das exportacións a Bélxica saíron a través do Porto de Vigo, mentres que o 62% foron a Alxeria.