Ferrol achega 33.000 euros ao programa educativo “Xadrez nas escolas”

A concelleira de Educación do Concello de Ferrol, Susana Martínez Galdós, asinou esta mañá un convenio de colaboración co presidente do Círculo Ferrolán de Xadrez, Juan Rodríguez Rey, para o desenvolvemento do programa educativo “Xadrez nas Escolas” durante o curso escolar 2014-2015 en centros públicos e concertados de Ferrol. O Concello de Ferrol achegará este ano un total de 33.000 euros a este proxecto pioneiro.

A edil Susana Martínez explicou que se impartirá como “actividade complementaria en horario lectivo nun total de 21 Centros de Educación Infantil e Primaria (CEIP) públicos e concertados” e que estará dirixido ao alumnado do último curso de Infantil, e de 1º, 2º e 3º de Primaria, o que supón unha participación de máis de 1.500 rapaces e rapazas. Así mesmo, a concelleira responsable das políticas educativas engadiu que este ano “Xadrez nas Escolas” se amplía a 3º de Primaria incorporando cinco grupos dos centros escolares Manuel Masdías, Cruceiro de Canido e Isaac Peral; ao tempo que manifestou o seu compromiso de estudar a posibilidade de ampliar o programa ao 3º curso de Primaria en todos os centros de ensino da cidade para o vindeiro ano.

“Xadrez nas Escolas” é un programa de carácter gratuíto para os centros educativos e o alumnado participante, xa que os gastos son costeados pola Concellería de Educación do Concello de Ferrol. Martínez Galdós destacou a importancia desta actividade complementaria que ten como finalidade ”que os menores aprendan a pensar por conta propia, analizar e resolver problemas, así como a coñecer as capacidades de cada un, traballar a memoria, a atención, comprensión e asimilación de conceptos, creando hábitos de estudo e estimulando a actitude e o desexo de superación mediante o coñecemento, e todo isto mentres se inculca a importancia de respectar as normas do xogo”.