Coruña Educa comeza actividade co seu primeiro programa ‘Coruña no Mundo’

O Concello, a través da área deEducación, Deportes e Mocidade dirixida por Francisco Mourelo, informa de que o programa Coruña no Mundo xa iniciou a súa actividade este curso 2014/15. De feito, 17 técnicos superiores do IES Ramón Menéndez Pidal, Eusebio da Garda, Fernando Wirtz e CIFP Paseo das Pontes, atópanse cursando o curso intensivo de idiomas, de 80 horas de duración. Unha vez finalizado, iniciarán a súa estancia profesional de longa duración -9 meses-, entre o próximo 31 de outubro e o 19 de abril de 2015, en empresas europeas situadas en Portsmouth (Reino Unido), ás que irán 6 bolseiros; Viena (Austria), con 5; e Florencia (Italia), con 6.

Como noutras ocasións, as empresas onde realizarán as súas prácticas teñen unha relación directa coa especialización destes mozos titulados en Comercio Internacional, Secretariado, Servizos en Restauración, Guía e Información Turística e Axencia de Viaxes e Xestión de Eventos.

Estes estudantes pertencen á convocatoria de Bolsas Europa FP – Proxecto Acore II que ofertou un total de 30 bolsas. Os 13 primeiros bolseiros xa  iniciaron a súa estancia profesional de 6 meses en Europa o 9 de maio, despois de recibir tamén un curso intensivo de idiomas, sempre en función do destino e a especialidade de cada un. As súas prácticas finalizarán o próximo 25 de outubro, xusto cando comezan os seguintes 17 bolseiros.

BOLSAS EUROPA FP – PROXECTO ACORE III

Por outra banda,  e dentro do mesmo programa na súa terceira edición, hai ofertadas 50 bolsas, das que se concederon as 18 primeiras a mozos titulados en ciclos de Grao Medio impartidos na cidade. Estes mozos están  a recibir no CIFP Paseo das Pontes, un curso de idiomas intensivo de 100 horas en inglés, francés e italiano, en función do seu destino. Este curso finalizará a mediados de outubro e será entón cando estes mozos inicien a súa estancia profesional en Belfast (Reino Unido), onde irán 4; a Cork (Irlanda), con 9; a Florencia (Italia,) 4; e a Bordeus (Francia), 1.

Estas estancias iniciaranse a partir do  7 de novembro e finalizarán entre xuño e xullo de 2015. Os participantes son técnicos nos ciclos medios de FP de Barbaría, Industria Alimentaria, Sistemas Microinformáticos e Redes, Instalacións Eléctricas e Automáticas, Atención a Persoas en Situación de Dependencia, Laboratorio, Mantemento Electromecánico, Electromecánica de Vehículos, Xestión Administrativa e Confección e Moda impartidos nos CIFP Paseo dás Pontes, IES A Sardiñeira, IES Fernando Wirtz, IES Calvo Sotelo, CIFP Someso e IES Urbano Lugrís.

Ademais, nestes momentos, e até o 30 de setembro, hai aberta unha segunda  convocatoria en www.edu.coruna.es  para 32 bolsas máis. Os destinos previstos son os Belfast e Portsmouth, en Reino Unido, Cork e Dublín, en Irlanda; Bordeus, en Francia; Florencia, en Italia; e Viena, en Austria. Estas estancias europeas realizaranse entre o 10 de xaneiro e o 20 de setembro do próximo ano. Os participantes recibirán tamén un curso intensivo de 100 horas de inglés, alemán, francés e italiano, en función do seu destino, que se desenvolverá desde mediados de novembro a mediados de decembro. 

En definitiva, con estes serán xa 85 mozos profesionais, desde o curso 2012/13, titulados en FP de Grao Medio e Superior que pasen por unha experiencia profesional europea de longa duración dentro do programa municipal Bolsas Europa FP.

BOLSAS USA

Por outra banda, os 46 alumnos e alumnas seleccionados no programa Bolsas USA 14/15, xa comezaron  o curso escolar nos seus destinos en Estados Unidos. En concreto, os mozos coruñeses están a estudar o grao 11 -equivalente a 1º de Bacharelato- en High Schools de 21 estados diferentes. Estas 36 mozas e 10 mozos da nosa cidade foron seleccionados nun proceso rigoroso onde se valoraron a media da ESO, a cualificación en inglés, a súa madurez e comportamento persoal. Ademais, tiveron que pasar unha proba específica realizada polo Servizo Municipal de Educación.

Desde o curso 2011/12, participaron no programa Coruña no Mundo, integrado por Bolsas Europa – FP, Bolsas USA e os intercambios nos centros, 884 estudantes coruñeses de secundaria, cunha valoración de 8.7 sobre 10 por parte da comunidade educativa.