Cores Tourís analizou co alcalde de Mondariz a perigosidade da estrada PO-252
O delegado territorial da Xunta en Pontevedra, José Manuel Cores Tourís, reuniuse esta mañá co alcalde de Mondariz, Julio Alén, para analizar a situación da estrada PO-252 entre Moscoso e Mondariz, ante a elevada perigosidade que presenta.
O alcalde trasladoulle a preocupación do municipio pola falta de seguridade viaria nesta estrada, que conta con tres curvas moi pechadas que crean un tramo moi perigoso.
O obxectivo do alcalde de Mondariz é obter a colaboración da Xunta de Galicia de cara a que se instalen barreiras de seguridade nalgúns tramos, colocándose a protección para ciclomotores.
En relación ás curvas que presenta esta estrada, Julio Alén transmitiu ao delegado territorial da Xunta o seu interese porque sexan corrixidas, de cara a que se mellore a súa seguridade viaria. “Como esta obra suporía un proxecto de maior calado”, explicou o alcalde de Mondariz, “desde o concello comprometémonos a poñer a disposición da Xunta os terreos que sexan necesarios para executar a mellora destas curvas. Non podemos esquecer que recentemente, no pasado mes de agosto, un garda civil sufriu neste mesmo punto un grave accidente de tráfico”.
José Manuel Cores Tourís comunicoulle a Julio Alén que dará traslado da súa demanda á Consellería de Medio Ambiente, Territorio e Infraestruturas para a súa avaliación.