Enviar a un amigo
Opinar
ImprimirAGE pedirá á Xunta que se retome o plan de atención primaria na sanidade de Ferrolterra
A vicevoceira de Alternativa Galega de Esquerda (AGE), Yolanda Díaz, esixirá á Xunta que retome o antigo plan de atención primaria – elaborado durante o bipartito-, así como outras melloras na xestión da sanidade na bisbarra de Ferrolterra.
Así sinalouno tras reunirse este xoves, durante máis de dúas horas, con integrantes da xunta de persoal do Complexo Hospitalario Universitario de Ferrol (CHUF), para coñecer as principais demandas deste colectivo, co obxectivo de, unha vez presentado o proxecto de presupostos da Xunta para a próxima anualidade 2015, achegar ao Goberno que preside Alberto Núñez Feijóo aqueles asuntos que non estean recollidos nestes.
Entre as propostas destes traballadores públicos figura que se retome o antigo plan de atención primaria, sobre todo “polo que están a vivir estes profesionais”, con todo tipo de intervencións, como “cirurxía ambulatoria, atención de chamadas telefónicas e xornadas excesivas”.
Ademais, Díaz tamén explicou que os traballadores reclaman que se retome o plan director do Hospital Arquitecto Marcide, para que o Sergas plasme cáles son as necesidades deste centro e dótese o mesmo de medios materiais e humanos, xunto aos “recursos económicos necesarios para a súa aplicación”.
CENTROS DE SAÚDE
Yolanda Díaz tamén instou ao Sergas a impulsar as construcións dos novos ambulatorios para os municipios de Narón, Ares, A Capela e Cedeira, e anunciou que levará ao Parlamento de Galicia o debate de peche de camas.
No caso do antigo Hospital Naval de Ferrol, denunciou que se “inaugurou un día a segunda planta e pechouse na xornada seguinte”, e dixo ademais que semanas atrás se viviu un caso de colapso no servizo de urxencias, con persoas esperando por cama ata 36 horas. “Permaneceron mentres tanto amontoados en cadeiras de rodas e padiolas”, afirmou.
A vicevoceira de AGE tamén criticou as derivacións a certos centros concertados, “de modo descarado”, e citou a Vigo, con Povisa; e Ferrol, co Hospital Juan Cardona, algo que atribuíu á intención dos populares de axudar “aos seus amigos da privada”.
