A venda de dúas novas parcelas incrementa a superficie vendida no parque empresarial da Sionlla ata 285.276 metros cadrados

O último consello de administración da empresa pública Xestur autorizou a venda de dúas novas parcelas no parque empresarial da Sionlla, en Santiago, cuxa sinatura de escrituras se realizou o pasado venres. En conxunto, as dúas parcelas supoñen unha superficie de 6.139 metros cadrados.

Con esta nova operación, na Sionlla xa se venderon 69.834 metros cadrados nun total de 21 parcelas adquiridas por 15 empresas diferentes. A esa superficie vendida hai que sumar 215.442 metros cadrados adxudicados a proxecto singulares, polo que o total de solo adxudicado no parque empresarial é de 285.276 metros cadrados, preto do 38 por cento da superficie total de parcelas do parque empresarial.

Ao mesmo tempo existe interese dun bo número de empresas pola posibilidade de adquirir solo na Sionlla, ata o punto de que na actualidade é o parque empresarial da provincia da Coruña sobre o que maior número de consultas atende Xestur.

Con esta venda, son preto de 300.000 metros cadrados a superficie vendida en firme (escriturada) en parques empresariais da Xunta de Galicia e Xestur dende comezos de 2013, por importe de preto de 14 millóns de euros.