A sesión plenaria da Coruña aproba a Conta Xeral de 2013

O Concello da Coruña, na sesión plenaria celebrada esta mañá no Palacio Municipal de María Pita, aprobou a Conta Xeral de 2013, na que se alcanzaron marcas de execución do orzamento -tanto a nivel global como no capítulo de investimentos- e na que se constata a rebaixa da presión fiscal -especialmente ás familias con menos poder adquisitivo- e do nivel de endebedamento.

O pleno tamén deu o visto e prace por unanimidade á concesión da Medalla ao Mérito, na categoría de Ouro, ao Colexio Oficial de Médicos da Coruña e a aprobación de 55.931,79 euros para equipar o Servizo de Extinción de Incendios e Salvamento (SEIS) con dous novos vehículos lixeiros.

CONTA XERAL

O Concello aprobou a Conta Xeral de 2013, que agora remitirá ao Consello de Contas. O concelleiro de Economía e Facenda, Roberto Coira, destacou que a Conta Xeral do ano pasado certifica a aposta do actual goberno por unha “xestión máis áxil, transparente e accesible”.

“Logramos ter máis orzamento conxelando os impostos municipais e logramos cifras de cumprimento do orzamento xamais alcanzadas neste Concello”, sinalou Coira, quen puxo como exemplo a marca histórica no grao de execución do orzamento (85%) e dos investimentos (65%, o que representa 20 puntos máis que na etapa do bipartito). “Ninguén foi capaz de executar nun ano unha porcentaxe tan alta do orzamento nin de investir tantos recursos na cidade e nos coruñeses”, engadiu o concelleiro, quen explicou que só PSOE e BNG presentaron alegacións á Conta Xeral, pero as súas propostas teñen un carácter valorativo que non constitúen un impedimento para a súa aprobación.

“Puidemos xestionar este orzamento conxelando os impostos e as taxas municipais por terceiro ano consecutivo, aforrando 10 millóns de euros a todos os coruñeses, incorporando bonificacións especiais na vivenda de protección oficial, en plusvalías e para familias numerosas e colectivos con menos recursos, pondo en marcha sistemas de pago inéditos nesta cidade. A pesar da conxelación de impostos municipais, logramos ser a cidade máis solidaria de Galicia ao dispor do orzamento máis alto para Servizos Sociais e a que conta con maior orzamento de investimentos para os barrios”, destacou o responsable municipal de Economía e Facenda.

Durante a súa intervención, Roberto Coira afirmou que a Conta Xeral de 2013 constata que o Goberno municipal camiña pola “senda correcta”, cun investimento estratéxico en proxectos sociais, emprego, deporte base, cultura, accesibilidade e rehabilitación, e en renovación de espazos públicos. Entre os exemplos que citou o concelleiro, están os 1.362 usuarios do servizo de axuda a domicilio, cun total de 347.813 horas; que se triplicaron o número de actividades socioculturais nos centros cívicos; que se incrementaron nun 30% os participantes na área de Promoción Económica e Emprego; que se varreron cada día 3,3 millóns de metros cadrados nos barrios da cidade; os cidadáns contan con 5 espazos deportivos máis que en 2011; e aforráronse 6,6 millóns de euros en adxudicacións.

Roberto Coira explicou que o grao de execución do orzamento tamén alcanza cifras históricas no apartado de ingresos, onde roza o 87%, o que permite contar cunha economía máis saneada e con maior liquidez para facer fronte aos gastos e aos investimentos programados, mantendo un nivel alto de recadación en período executivo, a pesar de rebaixar a presión fiscal ás familias con menos poder adquisitivo.

“Na nosa cidade, o incremento da recadación obedece a dous factores: por unha banda, os coruñeses cumpren cada vez mellor coas súas obrigacións tributarias, que oscila entre o 85,82% da recadación no imposto de vehículos e o 89,08% no de bens inmobles; e, polo outro, nunha mellor xestión para evitar a falta de pagamentos. O período medio de cobro situouse en 2013 nos 53 días, é dicir, dentro do período de pago voluntario dos impostos e a presión fiscal por habitante na Coruña sitúase en 560 euros, por baixo da media das cidades españolas de máis de 100.000 habitantes, que foi de 568 euros”, asegurou o concelleiro de Economía e Facenda.

Por último, Coira detallou que se rebaixou o nivel de endebedamento, pasando do 38,65% en 2010 ao 36,36% a 31 de decembro de 2013. A débeda actual é de 319 euros por habitante, case a terceira parte da media existente entre as cidades de máis de 100.000 habitantes, que alcanza os 883 euros por cidadán. Das 63 urbes españolas que están neste ranking, A Coruña atópase entre as dez cidades con menor débeda por habitante. O 70% da débeda viva pertence a anteriores responsables municipais.

COLEXIO DE MÉDICOS

A Corporación municipal aprobou por unanimidade a concesión da Medalla ao Mérito, na categoría de Ouro, ao Colexio Oficial de Médicos da Coruña, como recoñecemento ao labor que vén desenvolvendo desde fai 120 anos e como homenaxe á profesión médica, tan vinculada á cidade. A proposta, a petición do alcalde Carlos Negreira, pretende que esta entidade conte co recoñecemento non só do Concello, senón de todos os coruñeses e coruñesas.

A Medalla ao Mérito, na categoría de ouro, trátase dunha distinción municipal que ten en conta a traxectoria ou os actos singulares de especial transcendencia que desenvolvan persoas ou entidades propostas para a súa concesión nos ámbitos da cultura, a arte, o deporte, o medio ambiente ou a acción social e que redunden en beneficio da sociedade coruñesa. O Colexio Oficial de Médicos da Coruña -que o próximo 4 de outubro conmemora o 120 aniversario da súa constitución- conta con 6.000 colexiados, dos cales case a metade viven e prestan os seus servizos na cidade e a súa área metropolitana.

“A cidade da Coruña constitúe un referente pola calidade dos seus profesionais e o prestixio das súas clínicas e hospitais. Desde o punto de vista económico sitúase como un dos sectores máis puxantes no que traballan 7.000 coruñeses e coruñesas”, destacou a tenente de alcalde de Facenda e Administración Pública, Rosa Gallego.

CONTRIBUCIÓNS ESPECIAIS

A Corporación coruñesa tamén deu o visto e prace á aprobación de 55.931,79 euros para equipar con dous novos vehículos lixeiros o Servizo de Extinción de Incendios e Salvamento (SEIS). Este investimento corresponde ás contribucións especiais, recadadas a maiores do orzado e correspondente a 2013. En total, para a compra destes dous vehículos, o Concello investirá 62.146,44 euros, pois aos 55.931,79 euros da Unión Española de Entidades Aseguradoras e Reaseguradoras (UNESPA) súmanse 6.214,65 euros de fondos municipais (o 10% do investimento final).

As contribucións especiais recádanse a través do convenio asinado con UNESPA que para este ano, entre o Concello e a Unión Española de Entidades Aseguradoras e Reaseguradoras, supera os 1,12 millóns de euros. Con este investimento, a área de Seguridade Cidadá -ademais da compra dos dous novos vehículos que aproba no pleno do luns- poderá construír unha nova torre de prácticas e adquirir un vehículo lixeiro, un vehículo de altura, novo material de transporte e de rescate, para ximnasio e para mercadorías perigosas.

En 2012 e 2013, destináronse outros 1,72 millóns para a adquisición dun equipo de excarceración, un vehículo autobomba pesado, un vehículo de rescate e outro para traballos en altura, unha nova cocheira, unha estación de carga e seguridade, equipos de comunicacións, melloras na rede de hidrantes, mobiliario para o posto de control e subministración de material para o SEIS. A achega de UNESPA é un 68% máis con respecto a 2012, cando destinou 600.000 euros a proxectos do Servizo de Extinción de Incendios e Salvamento.

MOCIÓNS

O Goberno local aprobou unha moción de apoio á reforma do sistema electoral municipal e a promover a elección directa do alcalde. O concelleiro de Servizos Sociais, Miguel Lorenzo, sinalou que esta proposta nace do “respecto á vontade maioritaria dos cidadáns e a estabilidade municipal” e do espírito de “escoitar a vontade do pobo” para que a cabeza da lista máis votada nas eleccións locais sexa elixido alcalde.

Ademais, a Corporación aprobou por unanimidade, a proposta do PSOE, unha moción para pór en marcha medidas fronte ao repunte da violencia de xénero. Entre outras cuestións, proponse a posta en marcha de programas de formación, unha rede de apoio para as vítimas ou a adecuada dotación de medios xudiciais e policiais especializados para atender ás vítimas.