A implantación da Policía de Barrio mellora o cumprimento das ordenanzas municipais da Coruña

O portavoz do Goberno municipal, Julio Flores, presentou na Xunta Local de Seguridade celebrada esta mañá o balance da actividade do Corpo de Policía Local durante 2013, así como a análise preliminar da actividade desenvolvida nos primeiros oito meses de 2014, e anunciou que o Concello porá en marcha antes de final de ano tres novas campañas para mellorar a seguridade viaria e o cumprimento das ordenanzas.

O tenente de alcalde de Seguridade Cidadá destacou que en 2013 “a implantación definitiva da Policía de Barrio, xunto co incremento das tarefas de prevención”, logrou “mellorar o cumprimento das ordenanzas municipais” e tamén se incrementou a “colaboración entre a Policía Local e Nacional en diversos dispositivos relacionados coa seguridade cidadá”. “O pasado ano logrouse diminuír nun 16% as incidencias relacionadas coas ordenanzas municipais, destacando o incremento na vixilancia da ordenanza de ruídos e de animais, e tamén hai que destacar a colaboración da Policía Local en materia de seguridade cidadá ao realizar 166 detencións, un 57% máis que o ano anterior, das que 53 estiveron vinculadas con delitos de violencia de xénero”, engadiu.

Flores subliñou o esforzo realizado pola Policía Local no cumprimento das ordenanzas municipais, con 447 actuacións pola normativa de ruídos, 337 actuacións relacionadas coa ordenanza de limpeza (destacan as 217 por ouriñar na vía pública e 61 por grafitis) e 66 denuncias pola ocupación da vía pública sen licenza.

O responsable municipal de Seguridade Cidadá sinalou que outra das prioridades da Policía Local centrouse en desenvolver as medidas de prevención para lograr unha maior concienciación en materia de mobilidade e seguridade viaria, o que permitiu reducir en 2013 o número de atropelos na cidade e que non se producisen vítimas mortais en accidentes de tráfico. En materia de prevención, o tenente de alcalde puxo como exemplo as accións formativas da Policía Local que chegaron a 31 centros -un 50% máis que en 2012- e a 1.803 alumnos -un 31% máis-.

Como resumo da análise preliminar da actividade da Policía Local nos oito primeiros meses de 2014, Flores sinalou que continúa a tendencia do pasado ano respecto da diminución das incidencias relacionadas coas ordenanzas municipais e que se produciron menos intervencións da Policía Local relacionadas coa seguridade cidadá, tanto de persoas detidas como de incidencias relacionadas con episodios de violencia de xénero e de violencia doméstica. Doutra banda, constatouse un incremento do número de accidentes que non foi acompañado dun aumento no número de persoas feridas e tamén se incrementaron os atropelos en 2014, polo que se reforzarán as tarefas e programas de prevención que desenvolven conxuntamente a Policía Local e a Concellaría de Mobilidade.

Por último, o subdelegado do Goberno, Jorge Atán, informou á Xunta Local de Seguridade dos aspectos relacionados coa seguridade cidadá que son competencia do Corpo Nacional de Policía. Neste sentido, destacou que no oito primeiros meses de 2014 experiméntase unha diminución dos delitos na cidade con respecto ao mesmo período do pasado ano 2013. Producíronse descensos en diversas tipoloxías de delitos como os roubos con forza en locais, os roubos con violencia ou as subtraccións realizadas en vehículos. Doutra banda, a pesar do incremento producido en 2014 nos roubos en vivendas, o subdelegado do Goberno destacou que se produciron importantes incrementos no esclarecemento deste tipo de delitos, na eficacia policial e no número de detidos implicados en roubos en vivendas respecto ao ano pasado. Pola súa banda, Flores ofreceu á Subdelegación do Goberno a colaboración da Policía Local nos programas de prevención para tratar de evitar os roubos en vivendas.

POLICÍA DE BARRIO

Flores destacou que a implantación progresiva da Policía de Barrio permitiu dispor de 219 axentes na Unidade de Distritos -un 34% máis que ao comezo do mandato-, duplicando o número de efectivos que traballan nos barrios (de 50 policías a diario en 2012 a 95 en 2014). Esta medida traduciuse nunha maior presenza da Policía Local nas rúas e pasar de contar con patrullas a pé en 3 ou 4 barrios en 2011 a despregar na actualidade patrullas a pé da Policía local en 15 ou 20 barrios de luns a venres en quendas de mañá e tarde. Tamén informou de que o programa Policía Comunitaria permitiu desenvolver 77 reunións para mellorar a coordinación con asociacións de veciños e de comerciantes e con centros educativos e contar con información de primeira man dos propios veciños.

A aposta decidida pola Policía de Barrio e a súa implantación definitiva en 2013 traduciuse nunha mellor atención dos cidadáns, xa que case se multiplicaron por cinco as chamadas atendidas polas patrullas a pé (de 828 chamadas en 2011 3.980 en 2013), reducíronse nun 20% as chamadas recibidas na sala do 092e diminuíuse nun 16% as infraccións ás ordenanzas municipais.

BALANCE 2014 E NOVAS CAMPAÑAS

Tras analizar a evolución da actividade da Policía Local en 2014 e recoller as peticións dos representantes veciñais a través do programa de Policía Comunitaria, Julio Flores anunciou as tres novas campañas que levará a cabo a Policía Local no último trimestre do ano para o cumprimento das ordenanzas e a mellora da seguridade viaria:

– En outubro, a Policía Local e a Concellaría de Mobilidade desenvolverán un dispositivo especial de seguridade viaria para a prevención de atropelos.

– En novembro, implantarase un dispositivo especial de control da ordenanza de tenencia de animais, con especial fincapé nos cans de raza perigosa e as deyecciones na vía pública. En 2013, a Policía Local realizou 569 actuacións relacionadas con esta ordenanza, multiplicando por seis as realizadas en 2011, das que 320 o foron por mor de cans -incluíndo o traslado de 13 deles á canceira municipal- realizadas pola Patrulla Verde, bienpor requirimento da área de Medio Ambiente, ben por denuncia cidadá ou a iniciativa propia.

– En decembro, desenvolverase un terceiro dispositivo especial do 092 para a vixilancia e control dos adhesivos e carteis que se colocan no mobiliario urbano e nos espazos públicos.