A Estrada prepárase para o premio Manuel Reimóndez Portela

No recinto feiral estradense, ao longo de toda a semana, veu debullando o programa de xornadas técnicas que finalizará mañá co último dos relatorios.

A Universidade de Vigo, chega ao recinto feiral, para impartir o relatorio “Dez Exemplos innovadores do uso da madeira na construción” que, correrá a cargo de Juan Picos Martín, docente da Escola de Enxeñaría Forestal de Pontevedra. Esta xornada, dará comezo ás doce da mañá.

Está previsto que cento corenta alumnos do Colexio A nosa Señora de Lourdes e trinta e dous do Colexio Villar Paramá, visiten a exposición interactiva que a Consellería de Traballo e Benestar ten situada no pavillón uno e que a través de paneis interactivos explícalles o mundo do cooperativismo como forma alternativa de economía social.

O “Premio Xornalístico Manuel Reimóndez Portela”, copará a xornada vespertina. En devandito acto, procederase á proclamación oficial de gañadores da presente edición. Os coautores José Manuel Bertolo Ballesteros e Luís Manuel Ferro Pego, alzáronse co galardón da presente edición, por unha serie de catro artigos de temática variada, publicados en Faro de Vigo e Capicúa.

Este acto, como vén sendo habitual, constará de dúas partes. A primeira, no patio central exterior do recinto feiral, na cal se realizará unha descrición da figura de Manuel Reimóndez Portela que correrá a cargo da poetisa Rosalía Morlán Viéites, quen á súa vez, será a encargada de realizar unha ofrenda floral ante o monólito que perpetúa, a memoria de Reimóndez Portela.

A segunda parte do acto, desenvolverase no interior do pavillón catro, na que se fará a proclamación oficial dos gañadores e onde intervirá o mantedor do acto que nesta ocasión, será Francisco de Paula Puy Muñoz, catedrático de filosofia do dereito e secretario do chamado Estatuto dos Dezaseis, onde coincidiu con Reimóndez Portela, na redacción do anteproxecto do Estatuto de Autonomía de Galicia.

Está previsto que asistan ao acto varias autoridades de entre as cales podemos mencionar a: José López Campos, rexedor local, Valentín García Gómez, Secretario Xeral de Política Lingüística, Juan Manuel Constenla Carbón, Concelleiro de Cultura, Mercedes Cuiña Ponte, Directora Xerente da Fundación, membros da corporación municipal, integrantes do Comité de Seguimento de devandito premio, familiares e amigos do doutor Reimóndez Portela e demais personaxes do panorama sociocultural.

Por outra banda, o sorteo das tres primeiras ceas, foi a parar a Santiago de Compostela, Bueu e A Estrada. Os agraciados foron, José Manuel Castañal, Alvaro Regueira e Celia Canda, respectivamente.

Coincidindo co peche do recinto feiral ao público sortearanse outras tres ceas e o vindeiro sábado e domingo, os vales de compra e a viaxe para dúas persoas.

Coa xornada de hoxe, danse por concluídos os actos de carácter cultural e o programa de xornadas técnicas.