A Escola de Música de Lousame abre o prazo de inscrición para o curso 2014-15

A Escola de Música de Lousame abre hoxe luns o seu prazo de inscrición para o curso 2014-2015, cuxas clases darán comezo o sábado 4 de outubro e que se prolongarán ata o 14 de xuño de 2015. O prazo de anotación estará aberto ata o venres 26 de setembro e as inscricións poden formalizarse na Casa da Cultura (en horario de luns a venres, de 9 a 14:00 horas) ou por correo electrónico (escolademusicadelousame@hotmail.com). A folla de inscrición pode descargarse da web do Concello de Lousame (www.concellodelousame.com) ou recollerse na Casa da Cultura.

Ademais de incluír os datos persoais do alumno/a e dos seus pais/titores, o solicitante deberá indicar as materias nas que se matricula. A Escola de Música de Lousame ofrece Música e Movemento (para nenos/as de 4 a 7 anos), Linguaxe Musical (a partires dos 7 anos), Música Tradicional (Gaita e percusión tradicional) e instrumento. Os alumnos/as poderán escoller entre 11 instrumentos: óboe, clarinete, trompeta, trombón/bombardino, percusión, piano, frauta traveseira, saxofón, trompa, tuba e guitarra.

As solicitudes de novo ingreso deberán aboar unha matrícula de 20 euros no momento de entrega da folla de inscrición, cota que non terán que pagar os alumnos e alumnas que xa estiveran en anos anteriores na Escola de Música de Lousame. Os prezos mensuais dependen das materias nas que se inscriban os alumnos: 20 euros para os alumnos matriculados só en linguaxe musical ou só en música e movemento; 35 euros para os alumnos que se matriculen só na especialidade de instrumento; ou 40 euros para os matriculados en instrumento e linguaxe musical (o que inclúe 1 hora semanal de clase de instrumento, unha hora de clase de linguaxe musical e unha hora de conxunto instrumental).

Concertos didácticos

As clases terán lugar na Casa da Cultura (Portobravo), no local veciñal de Cruído e na Escola do Sanguiñal do 4 de outubro ao 14 de xuño. Ademais dos tradicionais festivais de Nadal e de Fin de Curso, a Escola de Música de Lousame ten previsto realizar este ano unha serie de actividades complementarias. Entre elas figuran excursións e concertos didácticos de Ludmila Orlova e de Xoán Curiel, cuxas datas serán determinadas nos próximos meses. Máis información nos teléfonos 981 82 57 80 e 676 98 26 04, ou no e-mail escolademusicadelousame@hotmail.com.