A Deputación de Pontevedra pon en marcha dous novos cursos de aQuelando3

O Centro Príncipe Felipe acolle dous novos cursos do proxecto aQuelando3, co que se pretende mellorar o acceso ao mercado laboral dos desempregados de máis difícil inserción.

Os dous novos cursos postos en marcha pola Deputación céntranse en Limpeza de superficies e mobiliario en edificios e locais, que comezou na tarde de onte e no que participan 15 persoas; e en Animación físico-deportiva e recreativa, que se iniciou hoxe con outros 15 participantes e coa presenza no acto de apertura da deputada Begoña Estévez.

Neste caso, o curso desenvolverase no Pavillón Polideportivo do Centro Príncipe Felipe, dadas as características especiais do curso, moi dinámico e que require de espazos amplos para a formación práctica.

De feito, foi preciso a homologación específica do pavillón para poder acoller tipo de actividades formativas.

Os dous cursos iniciados agora súmanse aos 3 que deron comezo a pasada semana en Pontevedra, Valga e Ponteareas, e aos que se irán engadindo novas actividades, ata un total de 24 cursos, nos que se formarán 360 desempregados da provincia.