A conselleira de Sanidade di que o convenio con Povisa trata de garantir a estabilidade da empresa

A conselleira de Sanidade, Rocío Mosquera, defendeu que o convenio asinado co centro hospitalario de Povisa busca “garantir a estabilidade da empresa” que conta, segundo remarcou, con 1.500 traballadores.

Nunha visita ás obras de ampliación do Complexo Hospitalario Universitario de Ourense (CHUO), a conselleira afirmou comprobar “persoalmente” que se cumpren os prazos da primeira fase que suporá, en mes e medio, ter rematado o derrubamento do edificio administrativo e a escavación previa á cimentación do novo edificio.

Ao tempo, tras unha reunión de dúas horas con responsables da empresa adxudicataria das obras, respondeu a preguntas dos xornalistas sobre o convenio con Povisa, e esgrimiu que este se subscribiu para “garantir a estabilidade” dunha empresa que conta con 1.500 traballadores e porque en sanidade “son necesarios todos os recursos, tanto públicos como privados”.

Mosquera explicou que a consellería ten concertos con “practicamente todos” os hospitais privados galegos, “pois o seu papel é o de complementar os públicos, pois este é o compromiso”. Segundo a conselleira, sería un “desperdicio” non usar todos eses recursos en aras dunha maior eficiencia “e para atender mellor os pacientes e de forma equitativa en toda Galicia”.

LIBRE ELECCIÓN

No marco do convenio asinado con Povisa, destacou a novidade de incorporar a libre elección de centro hospitalario para os pacientes da área. “É moi importante no convenio asinado, que se antes os centros de saúde de varios concellos debían derivar os seus pacientes directamente a Povisa, agora, precisamente para garantir esa equidade, todos os cidadáns, tamén os eses concellos, poderán elixir entre o privado Povisa e o público universitario de Vigo”.

Tamén respondeu a unha pregunta sobre o cumprimento de convenio tras a apertura do novo hospital de Vigo, en obras. “Hai pacientes para todos”, resolveu.