A automoción galega viaxa a México para participar na feira Sapuraiya 2014

O próximo mes de Novembro, máis dunha decena de firmas galegas pertencentes á industria metalúrxica, desprazaranse a México para participar na próxima edición da feira SAPURAIYA 2014, que se celebrará entre os días 3 e 8 de novembro na cidade de Celaya, un dos principais focos de crecemento e de atracción de investimentos na rexión do Bajío Mexicano.

Enrique Mallón, Secretario Xeral de ASIME manifesta que “na actualidade, e desde hai anos, está a desenvolverse nesta rexión un importante polo de fabricación de automóbiles que está a atraer á zona, ademais da varias das empresas fabricantes, a un importante número de provedores de primeiro e segundo nivel (Tier 1 e 2), que aínda así, non son capaces de absorber a gran demanda de compoñentes existente.”

Segundo palabras de Enrique Mallón, “Como puidemos comprobar o ano pasado, o bajío mexicano converteuse no principal polo industrial para a construción de automóbiles en México, é algo perfectamente tanxible; así, se un se despraza á zona, comprobará que se necesita máis que nunca o know how e a tecnoloxía que lles poden achegar as nosas empresas.”

Debido ao establecemento e á posta en funcionamento das plantas de Fonda, Mazda e Toyota, instaláronse na zona máis de 20 empresas provedoras de diferentes países, sendo algunhas delas galegas e contando con planta propia na zona de Celaya, as cales pretenden ampliar no curto prazo e que están a servir como “efecto chamada” para outras empresas desta importante actividade en Galicia.

“Por iso, desde ASIME, como coñecedores do país debido ás numerosas viaxes de negocios realizadoa desde o ano 2005, á participación noutras feiras sectoriais como a PLASTIMAGEN, que se celebra na Cidade de México e especializada na industria do plástico e dos moldes, e sobre todo, á visita deste evento na edición de 2013, contaremos para a edición deste ano 2014 cunha caseta de 50 metros cadrados, onde se representará e agrupará ao importante número de empresas asociadas pertencentes a esta actividade (+ de 200 empresas asociadas), sendo varias as que contarán con presenza física na feira e que participarán nos encontros de negocios organizados cos principais fabricantes e provedores instalados xa na zona, os cales exporán as súas necesidades e buscarán entre as empresas asistentes aos seus posibles provedores.”

Proba da importante rede de contactos desenvolvida por ASIME coa industria metalúrxica mexicana ao longo das súas anteriores visitas ao país, e das estreitas relacións que mantén coas asociacións e organismos máis importantes do país, é a visita este ano á sede de ASIME de representantes de CANACINTRA (Cámara Nacional da Industria Transformadora) e de PROMEXICO, organismo de promoción de exportacións e atracción de investimentos dependente do Goberno Mexicano. En ambos os casos, realizáronse senllas xornadas que atraeron o interese e a participación de numerosas empresas en cada unha delas.

O bajío mexicano converteuse no principal polo industrial para a construción de automóbiles en México. Enrique Mallón, manifesta que “debido ao establecemento das plantas de Fonda, Mazda, Toyota e a planta de transmisións de Fonda, instaláronse na zona máis de 20 T1 e T2, co que se está impulsando aceleradamente a integración da cadea de provedores que se atopa en pleno desenvolvemento e por tanto, as súas necesidades de equipamento de tecnoloxía punta, capacitación e moitos outros servizos, representan oportunidades de negocio moi importantes para as empresas do sector.”

Enrique Mallón destaca que, “esta actuación é unha das máis importantes que desenvolveremos no último trimestre do ano, dentro do Plan de Internacionalización desenvolvido por ASIME. Este Plan, foi cualificado pola Xunta Directiva como estratéxico para reforzar a diversificación tanto de produtos como de mercados das nosas empresas.”

Entre 2008 e 2013 empresas como Nissan, General Motors, Volkswagen, Ford, Honda, Fiat, Mazda, Daimler Trucks e Audi entre outras inxectaron en México 21,055 millóns de dólares en capital produtivo para abrir plantas novas ou ampliar algunhas que xa estaban a operar. A metade do investimento foi para a rexión do Bajío, e desde 2010 esta rexión acaparou o 70% do total. México é o 8º construtor do mundo de automóbiles, o 7º de vehículos pesados e o 5º de compoñentes.

Satisfacción polo repunte das vendas de automóbiles durante o mes de agosto

A patronal do Sector Metalúrxico, ASIME, mostra ademais a súa satisfacción ante a melloría das cifras que arroxan os estudos publicados nos últimos días, as cales pon de manifesto o crecemento da automoción en España entre os meses de Xaneiro e Agosto. Este crecemento, dun 16,4% respecto ao mesmo período do ano anterior, está motivado en gran parte polo “Plan Pive 6”, ademais de polas ofertas das propias marcas e os seus concesionarios.

“Estes datos, aplicados a Galicia, sabemos que supoñen unha motivación extraordinaria para as marcas implantadas na nosa comunidade autónoma, os seus provedores e, por extensión, ás do resto de España. Con estes datos refórzase o que sempre manifestamos desde ASIME, no sentido de que para conseguir que os grandes fabricantes aposten pola súa localización aquí, débese reforzar o potencial da demanda doméstica.  Esta localización, e polo tanto, a da súa cadea de subministración, manterase en Galicia e España sempre que o mercado nacional de venda de automóbiles e dos seus compoñentes responda á oferta dos fabricantes aquí implantados”, sinala Enrique Mallón.