Preto de 500 cativos tomaron parte na primeira xornada da Semana Infantil de Cedeira

O tempo acompañou e centos de persoas se congregaron esta mañá no Parque do Sagrado Corazón para seguir as actividades da Semana Infantil na súa primeira xornada. Preto de cincocentos nenos e nenas tomaron parte nas Probas Atléticas, que inauguraron o programa deseñado polo Concello de Cedeira. Carreiras de velocidade, resistencia e relevos sucedéronse dende as 11 horas e nelas participaron nenos incluso de pouco máis dun ano ata os 14. A Semana Infantil continuará este martes cos Xogos dos Avós. Entre as 11 e as 14 horas, o Concello propón esquecerse da videoconsola e recuperar aqueles xogos de toda a vida como o pano, a carretilla, a cadeira ou os zancos, entre outras propostas. O mércores será o turno das Carreiras de Humor, e o xoves, do tradicional concurso de Castelos na area.