Os atletas da Sociedade Ximnástica de Pontevedra culminan unha tempada chea de records

Por primeira vez na historia un atleta da Sociedade Ximnástica bateu un record nacional, trátase de Marc Tur que o pasado 12 de decembro na localidade madrileña de Xetafe, estableceu unha nova plusmarca española júnior, na distancia de 10 quilómetros marcha en ruta, con 40 minutos e 17 segundos. Ademais con esta marca liderou o ranking mundial júnior do ano 2013.

Con esta presentación non é estraño indicar que tamén esta marca é novo record absoluto da Sociedade Ximnástica; ao que se lle xuntan outras cinco máis nas distancias de 5 km. en ruta con 20.14 e 19.18.35 en pista; os 10 km. en pista con 40.19.85; os 20 km. en ruta con 1h22.16 e en pista con 1h23.22.1.

En canto ás marcas autonómicas, dous atletas da Ximnástica bateron o record galego xuvenil, trátase de Darío Costas que o fixo en varias disciplinas, os 100 metros, con 10.98; e as probas combinadas de Heptatlon en pista cuberta con 4.709 puntos e Décatlon en pista ao aire libre con 5.769 puntos. Alfonso Pérez mellorou a súa propia marca de Galicia do ano pasado na distancia de 400 metros, con 48.99 no nacional xuvenil.

O veterano Carlos Ferrer tamén mellorou a plusmarca autonómica en varias disciplinas de lanzamentos da súa categoría veterana, o lanzamento de disco, con 41.29, o lanzamento de martelo pesado con 16.60 e o Péntatlon de lanzamentos con 3.355 puntos. Por último o seu irmán, Santi Ferrer, con 2.90 no salto con pértega baixo teito, bateu o record galego veterano da súa categoría.

Está a ser unha tempada fantástica porque ademais noutras 8 disciplinas atléticas melloráronse os records absolutos da Sociedade Ximnástica, Manuel Muíños e Lysvanys Pérez, estiveron a pelexarse polo record do salto de altura, Lysvanys chegou até os 2.07, pero Manuel saltou 2.08 o pasado 15 de febreiro en Valladolid.

Eduardo Suárez arrebatou o record de 800 metros a Víctor Riobó, 10 anos despois con 1.47.95.

Robertas Geralavicius mellorou a marca de Marathón con 2 horas 21 minutos e 24 segundos; tíñao Javi Vázquez desde fai 13 anos no Maratón de Róterdan.

Outro record que levaba unha década en vigor, o de lanzamento de disco, a cargo de Martín Brea, foi mellorado por Víctor Galego con 56,67 que lanzou en Vigo o 19 de xullo.

Eva Iglesias mellorou as súas marcas da Ximnástica en diferentes distancias da especialidade de marcha, de 10 km. e 20 km.; arrebatándolle a Raquel Rodríguez, o único que quedaba, o de 5 km. marcha en pista, despois de 17 anos, con 23.44.84.

O equipo de substitucións 4×400 da Ximnástica, volveu clasificarse para o Campionato de España e de paso volveu mellorar o record absoluto con 3.14.13, grazas a Eduardo Gallardo, Eduardo Suárez, Alfonso Pérez e Ignacio Sarmiento. O propio Sarmiento mellorou tamén a súa marca dos 400 metros valas con 50.63 no nacional absoluto.

Tantos records é algo excepcional pero demostra o gran nivel ao que chegaron moitos dos atletas da veterana Sociedade, esta tempada.