O vindeiro luns comeza a primeira fase de peatonalización da Cidade Vella

A concelleira de Tráfico, Mobilidade e Uso e Utilización do Dominio Público, Begoña Freire, lembrou esta mañá que o vindeiro luns, 18 de agosto, comezará a primeira fase da peonalización do centro histórico, cumprindo, deste xeito, cunha vella demanda dos residentes e comerciantes da zona, saldando unha débeda que ten pendente a cidade desde que en 1984 declarouse BIC como conxunto histórico artístico. A edila quixo deixar claro que é un paso imprescindible que se está acometendo con valentía e humildade para recuperar a esencia dunha cidade alta que fixo crecer á Coruña, protexeuna de invasións e na que non pode convivir o aparcadoiro libre coa calidade de vida, acceso a vivendas e protección patrimonial. “Iso é indiscutible, non está nin sequera a debate noutras cidades, ninguén se expón outra cousa”, sinalou.

Freire explicou, en Porta Real, a sinalización que estará vixente a partir da próxima semana nas 6 entradas á Cidade Vella: Porta Real, Rúa Tabernas, O Parrote (á altura de Capitanía), Isabel López Gandalla, calexón de San Benito e rúa Porta de Aires.

PRIMEIRA FASE

Begoña Freire explicou cales serán a principais característica desta fase inicial:

– A peonalización circunscribirase á zona interior do centro histórico, é dicir, a área que comprende os edificios cuxo acceso se sitúa no interior do perímetro, formado por praza de María Pita (con fachada posterior a Capitán Troncoso, rúa ou praza Anxos), María Barbeito, parte de Rúa Santiago, paseo da Dársena, paseo de O Parrote, rúa Maestranza, parte do campo da Estrada e parte de Xeneral Alesón.

– Estará permitida a circulación para todos os vehículos, pero só os residentes e os titulares de establecementos da Cidade Vella poderán estacionar dentro do centro histórico, así como os vehículos de dúas rodas. No caso dos comerciantes, poderán aparcar para os labores de carga e descarga durante un máximo de 30 minutos, de 06.00 a 22.00 horas. Os vehículos de mercadorías realizarán os labores de carga e descarga en horario de 06.00 a 11.00 horas.

– En todo momento garantirase o acceso aos portais e dos vehículos de emerxencias -non se pode estacionar en rúas nas que o espazo de vía libre para a circulación resulte inferior a 3 metros-, ademais de respectarse as construcións de interese histórico e cultural existentes no barrio.

– A velocidade máxima será de 20 quilómetros por hora.

– Para velar polo cumprimento desta primeira fase da peonalización, instaláronse sinais informativos nos accesos que quedarán habilitados á Cidade Vella -que informarán de que está prohibido estacionar con excepción de vehículos con cartóns- e contarase coa presenza da Policía Local, que na primeira semana exercerá, ademais, unha función preventiva e informativa.

O Concello concluirá a recuperación do espazo peonil da Cidade Vella nunha segunda fase cuxa posta en funcionamento coordinarase co final das obras de reurbanización da Mariña. Nela, a circulación na zona intramuros do centro histórico limitarase exclusivamente a residentes e titulares de establecementos. Esta primeira fase planificouse para compatibilizar a peonalización da Cidade Vella coas obras que se están executando na Mariña

CARTÓNS DE RESIDENTES E COMERCIANTES

A Concellaría de Mobilidade puxo en marcha, previamente, unha campaña informativa dirixida tanto aos veciños do barrio como aos establecementos alí situados. Enviáronse cartas aos residentes con información e modelos de solicitude de cartón; leste mesmo material entregouse aos establecementos en man e repartíronse un total de 4.000 trípticos na rúa e caixas de correos. Ademais, atendéronse máis de 500 chamadas de cidadáns que pediron información relativa a esta peonalización.

“O Concello xa fixo entrega, até onte, dunhas 400 cartóns e estaban pendentes ao redor de 50”, informou a concelleira. Freire lembrou que, a partir do luns, quen non soliciten dita cartón poderán facelo, exclusivamente, nas oficinas da Concellaría de Mobilidade situadas na estación de autobuses.

Begoña Freire enumerou os requisitos para posuír este tipo de cartón: ser residente empadroado na Cidade Vella, con vehículo ao seu nome e censado no barrio, e que se atope ao corrente no pago do IVTM; ou ser titular de establecemento con atención ao público na Cidade Vella e que tamén deberá estar ao corrente do imposto de circulación, ademais de ter necesidades de carga e descarga. Begoña Freire explicou que se expedirá un cartón para necesidades especiais, como son as persoas con mobilidade reducida. Neste caso, o cartón incorporará a data de inicio e de fin de devandita autorización para estacionar. Aclarou que os requisitos esixidos son similares aos que dispoñen de cartón de residente (zona verde) no resto de barrios da cidade.

Begoña Freire destacou que este proxecto ten como principal obxectivo mellorar a calidade de vida dos residentes do centro histórico e das persoas que visiten unha das zonas máis emblemáticas da cidade, ademais de mellorar a súa mobilidade e a súa seguridade e protexer o patrimonio histórico e cultural. Preténdese xerar novas oportunidades para o comercio e a hostalaría, lograr espazos de calidade protexendo o patrimonio histórico; garantir a seguridade dos residentes e conceder o máximo protagonismo ao peón.

Esta nova proposta preséntase de acordo ás directrices do primeiro Plan Municipal de Mobilidade Sustentable (PMUS) da Coruña e do futuro Plan Especial de Protección e Reforma Interior (PEPRI), e tendo en conta aos veciños e comerciantes do barrio, posto que a intención do actual equipo de goberno -do mesmo xeito que está a ocorrer nos proxectos de urbanización da Mariña e O Parrote- é converter á persoa no centro de atención.

“Este ano cúmprense 30 da declaración da Cidade Vella como Ben de Interese Cultural. Outros gobernos non cumpriron as promesas feitas a veciños e comerciantes e tivo que ser este Goberno local o que recupere a esencia e a orixe do corazón de
A Coruña para que non siga sendo o aparcadoiro libre do resto da cidade”, concluíu.