O Concello de Lugo recorrerá a suspensión dos servizos mínimos do 100% para a recollida de lixo

O Concello de Lugo recorrerá a resolución xudicial que suspende os servizos mínimos do 100% para o servizo de recollida de lixos nesta cidade, ante a folga que xa cumpre 54 días, segundo avanzaron fontes municipais.

   O Consistorio lucense defende que Fiscalía lle dá a razón cando alude á posible necesidade de servizos mínimos do 100% naqueles puntos que sexan detectados como de emerxencia sanitaria. En concreto, na xornada deste venres establecéronse 13 puntos de emerxencia sanitaria, tres menos que a pasada xornada.

   Por mor da paralización destes servizos mínimos, entra en vigor o anterior decreto, que foi publicado o 7 de xuño pasado no Boletín Provincial. Así, os servizos mínimos agora vixentes serían do 50% para limpeza viaria, do 70% para recollida de residuos sólidos urbanos e bolseo e do 50% para envases lixeiros, papel e cartón e vidro.