Maxi Kleber e Adam Waczynski veranse as caras no primeiro partido clasificatorio do Preeuropeo

Até catro xogadores do Rio Natura Monbus Obradoiro atópanse concentrados coas súas respectivas seleccións durante este mes de agosto, trátase de Pavel Pumprla e Rafa Luz, que xa estiveron ás ordes de Moncho Fernández a pasada tempada, e as recentes fichaxes,Maxi Kleber e Adam Waczynski.

Rafa Luz, recentemente incluído na convocatoria da súa selección, é o único que ten opcións de disputar o Mundial de Baloncesto que se disputará en España entre os días 30 de agosto e 14 de setembro. En caso de ser seleccionado, enfrontaríase á selección española na primeira fase de grupos.

Os outros tres xogadores obradoiristas, Pavel Pumprla, Maxi Kleber e Adam Waczynski, xogarán este verán o Preeuropeo 2015, onde buscarán unha praza para o Eurobasket 2015, que aínda non ten unha sede definitiva dado que a FIBA decidiu cancelar a súa celebración en Ucraína ante os enfrontamentos que aínda sacoden o país. Tan só 14 seleccións conseguirán unha praza para o Torneo, para o cal xa están clasificadas as dez seleccións continentais que disputan o campionato do mundo.

Os novos xogadores do Rio Natura Monbus Obradoiro Adam Waczynski e Maxi Kleber veranse as caras nun dobre enfrontamento os días 10 e 20 de agosto no Grupo C, no que tamén están incluídos Austria e Luxemburgo.

Por último, o renovado xogador obradoirista Pavel Pumprla tentará coa súa selección, República Checa, volver estar nun Europeo sendo un dos capitáns do seu equipo nacional. A República Checa está encadrada no Grupo E con Portugal, Xeorxia e Hungría.

Os primeiros clasificados de cada grupo e os seis mellores segundos conseguen unha praza para o próximo Europeo.