Máis que comercio! elixe os establecementos favoritos no CCA de Cangas, en Moaña e en Bueu

A directora xeral de Comercio, Sol Vázquez Abeal, entregou hoxe os recoñecementos aos tres establecementos elixidos como os seus favoritos polos clientes participantes na campaña da Xunta Centros Comerciais Abertos, Máis que comercio! nos centros comerciais abertos de Bueu, Cangas e Moaña.

No caso de Bueu, o establecemento elixido foi o centro de fisioterapia Nove, un negocio que ofrece diferentes tratamentos e actividades dirixidas. Pola súa parte, os clientes de Cangas escolleron a Deportes Plusmarca, con preto de vinte anos de actividade e que comercializa, ademais de roupa para facer deporte, moda deportiva para a rúa. E en Moaña elixiron a APP Informática, dedicada á venda e reparación de ordenadores e videoxogos.

Estes tres negocios foron os que máis clicks recibiron en cada un dos CCAs en www.maisquecomercio.com, web na que os clientes podían participar durante todo o mes de xuño nun xogo en liña por cada 5€ de compra e optar a diferentes premios ao tempo que elixían o seu comercio preferido. No mes no que durou a campaña, estes tres CCAs rexistraron en total preto de máis de 11.000 participacións.

A directora xeral de Comercio, Sol Vázquez Abeal, foi a encargada xunto co presidente de Fecimo, Xosé Bangueses, e representantes dos tres centros comerciais abertos, de entregar esta mañá o diploma aos establecementos máis votados, así como os agasallos aos clientes gañadores.

Vázquez Abeal salientou que Máis que comercio!, que está a percorrer Galicia durante todo o ano, celebrándose cada mes en cinco centros comerciais abertos diferentes, ten por obxectivo resaltar os valores do comercio de proximidade, como son a calidade, o trato ao cliente ou a variedade, ademais de resaltar o traballo dos centros comerciais abertos, unha fórmula que permite, desde o asociacionismo, o desenvolvemento de estratexias comerciais e a prestación de servizos de forma conxunta no pequeno comercio para mellorar a súa competitividade.

Lembrou Vázquez Abeal que o impulso ao asociacionismo é un dos eixos da estratexia específica da Consellería de Economía e Industria de apoio ao comercio de proximidade, salientando a importante labor que desenvolven tanto Fecimo como os centros comerciais abertos de Bueu, Cangas e Moaña.