Jesús Sanjuás afirma que non hai problema ningún e que foi legal todo

O alcalde do municipio coruñés de Boqueixón, Jesús Sanjuás, mostrouse tranquilo este martes á súa saída dos xulgados de Lugo despois de declarar durante unha media hora ante a xuíza Pilar de Lara, en calidade de testemuña no marco da ‘Operación Pokémon’, que investiga unha suposta trama de subornos de empresas a políticos para obter concesións de servizos públicos.

Sanjuás, que deixou a sede xudicial entorno ás 14,30 horas acompañado polo tenente de alcalde, Manuel Mauriño -xunto ao que chegou sobre as 9,45 horas-, afirmou, a preguntas dos medios de comunicación, que respondeu “a todas as preguntas” que o fixo a xuíza. “E ben, todos contentos”, aseverou.

Así, preguntado sobre se espera que as declaracións desta xornada sirvan para esclarecer o acontecido no Concello de Boqueixón, respondeu que “si”, xa que, segundo subliñou, nesta localidade “non hai problema ningún” e foi “legal todo”.

O actual rexedor presidía a mesa de contratación do contrato que investiga De Lara. Ademais, substituíu na Alcaldía ao anterior primeiro edil, Adolfo Gacio, unha vez que este foi detido en setembro de 2012, cando estalou a ‘Operación Pokémon’, na que segue imputado.

Á súa chegada aos xulgados, Jesús Sanjuás defendeu que “as cousas se fixeron ben” en Boqueixón e que o contrato era “completamente legal”.

Este martes tamén compareceron ante Piar de Lara como testemuñas a concelleira do PP María Dolores García Couto; o do BNG Xabier Canabal Fernández e o do PSdeG David Paulino Calvelo Otero.

PREGUNTAS SOBRE A TRAMITACIÓN DUN CONTRATO

Nunha conversación con xornalistas, Calvelo Otero chamou a atención sobre o elevado número de cuestións que realizou a instrutora da ‘Pokémon’ e titular do Xulgado de Instrución número 1 de Lugo, relacionadas coa tramitación do contrato con Vendex, empresa que centra a investigación.

Ademais do alcalde e os edís, esta xornada tamén declararon como testemuñas en Lugo varios traballadores e funcionarios da Casa do concello coruñés.