Hernández considera que o encontro de Rajoy e Merkel en Santiago será unha oportunidade de repercusión europea

O alcalde de Santiago, Agustín Hernández, destacou que o encontro que terán na capital galega o presidente do Goberno, Mariano Rajoy, e a chanceler alemá, Angela Merkel, será “unha oportunidade” de ter repercusión europea.

Para o rexedor, o encontro informal que está previsto para este mes de agosto representa a oportunidade de que unha “persoa da categoría mundial” de Merkel estea en Compostela e visite a Catedral. Ademais, Hernández considerou que a chanceler poderá comprobar ‘in situ’ os valores patrimoniais e artísticos da cidade.

Así, confiou en que a cita teña repercusión nun país como Alemaña, “emisor de moitos turistas” que chegan a Santiago, polo que supón unha “boa noticia” e carrexa unha “valoración positiva”.

En canto á data e ao programa que desenvolverán en Santiago, Hernández sinalou que “non hai ningunha data confirmada” e que tampouco dispón da programación da visita.