Haris Giannopoulos: “Kostas e Vasilis dixéronme que estaría moi ben aquí”

Presentación de Haris Giannopoulos

Esta mañá nas oficinas de Espiña & Delfin en Santiago de Compostela realizouse a presentación oficial do novo xogador do Rio Natura Monbus Haralampos “Haris” Giannopoulos. Óscar Rodríguez, administrador de Espiña e Delfín e membro do Consello de Administración, presentou xunto ao director xeral do club, Jose Luís Mateo, ao beirado grego de 24 anos procedente da Bruixa D´Or Manresa. 

Rodriguez abriu a rolda de prensa resaltando que é o quinto ano que un xogador do equipo se presenta na sede de Espiña&Delfín. Posteriormente, o conselleiro realizou un breve repaso á traxectoria deportiva de Haris e destacou que os obxectivos de grandes xogadores como el deben ser “esforzarse ao máximo dando o mellor de si mesmos e pensar só en gañar o próximo partido, como o propio Moncho Fernández di sempre, filosofía coa que o club até agora chegou sempre a puntos interesantes”.

“Procede da Bruixa D’Or Manresa, onde esta última tempada ha promediado 7.0 puntos (47% en tiros de dous, 34% en triplos e 92% en tiros libres) e 3.2 rebotes en 19,5 minutos. Internacional nas categorías inferiores helenas U20 (medalla de ouro no Europeo de Rodas’09), U18 (prata no Europeo de Madrid’07) e U16, no seu palmarés figura tamén o título de Liga que conseguiu co Panathinaikos fai dúas campañas. Anteriormente tamén defendeu as camisetas de Peristeri (2011/12), Panionios (2009-11), Olympiakos (2008/09) e PAOK Salónica (2005-08)”, explicou Rodríguez en canto á traxectoria do xogador.

Ás palabras do conselleiro do club, o Director Xeral engadiu que “Espiña & Delfín segue o día a día do Rio Natura Monbus Obradoiro e a súa presenza é fundamental para que o club leve unha traxectoria de seriedade e viabilidade que resulta capital para o seu presente e futuro. Precisamente o xogador que presentamos hoxe reúne certas similitudes con esta empresa: fai un traballo moi importante, moitas veces escuro, que non se ve, pero que resulta tan necesario para o equipo como a propia auga”.

Sobre o xogador, Mateo destacou que “entende o xogo e a súa envergadura e presenza física permitiron completar o perímetro mellorando neste aspecto. Con Haris incorporamos a un beirado completo, capaz de lanzar, de postear, de rebotear, de defender e, sobre todo, de xogar para o equipo e adaptarse ás súas necesidades. No seu momento tomou a decisión de vir probarse á liga Endesa podéndose quedar no seu país, nunha situación relativamente cómoda e en equipos importantes, o que denota a súa ambición”, terminou.

O xogador grego, de vinte e cinco anos e 2,01 metros, xa sente totalmente integrado no vestiario. “Antes de vir falei con varios xogadores que xogaran nesta liga e no Rio Natura Monbus Obradoiro, Kostas (Vasileiadis) e Vasilis (Xanthopoulos). Dixéronme que estaría moi ben aquí porque o adestrador e o club son moi bos. Estou moi contento, é unha boa experiencia e penso que será unha gran tempada”, indicou.

A pasada campaña fíxoa na Bruixa D’Or Manresa, aínda que nesta ocasión quería probar outras opcións tras a súa decisión de abandonar a liga grega. “É subir un chanzo máis na miña carreira. Sempre é un novo desafío, ir cada vez máis cara arriba”, subliñou.

Agora está contento co seu adestrador, Moncho Fernández, que busca que os xogadores apliquen a súa intelixencia sobre a pista. “Gústame porque non deixa nada á sorte. Ten unha solución para calquera situación que che poidas atopar nun partido. Só tes que lela e logo reaccionar”, argumentou.