Gómez Noya buscará a gloria en Edmonton

Javier Gómez Noya e o tríatlon galego teñen esta fin de semana unha cita coa historia en Edmonton (Canadá). En xogo está o cuarto mundial para o ferrolán (foi campión do mundo 2008, 2010 e 2013) e converterse desta forma na figura máis destacada do tríatlon mundial. Números incontestables que amosan que detrás do galego hai unha lenda viva do tríatlon mundial.

Pero o incrible atractivo da proba do domingo 31 de agosto (20:00 horas, TVG2 en directo), non pode facer que esquezamos a participación doutros galegos en Edmonton. Susana Rodríguez xa logrou onte a medalla de prata no Mundial do Acuatlón paralímpico, aínda que para ela a proba importante será a do sábado: Campionato do Mundo de Paratríatlon. E ademais, Antonio Serrat competirá o venres no Mundial júnior, mentres que Fernando Alarza e Maria Ortega disputarán as probas elite. Un programa de actos moi completo e atractivo para o tríatlon galego e iso a pesar de que en Edmonton non están por decisión da Federación Española de Tríatlon, Carmen Gómez (júnior) e Uxío Abuín (sub 23), que lograran a clasificación para disputar estas probas.