Frades conclúe os campamentos estivais de conciliación

O Concello de Frades concluíu con éxito os seus campamentos de conciliación deste verán, nos que participaron nenos e nenas maiores de catro anos e que desenvolveron as súas actividades en diversas instalacións municipais como a piscina, o campo de fútbol ou o edificio multiusos.

Os nenos e nenas dos campamentos entretivéronse e aprenderon durante as semanas dos campamentos con propostas como sesións de contacontos para a promoción da lingua galega e dos valores de igualdade, clases de baile e música ou obradoiros de pulseiras, manualidades, cupcakes e cociña, ademais de días de xogos na piscina, actividades deportivas ou saídas de sendeirismo.

O alcalde de Frades, Roberto Rey, acudiu á festa de despedida dos campamentos e destacou a importancia deste tipo de actividades no municipio “porque permiten que os nenos e nenas teñan alternativas de tempo libre durante as vacacións escolares e manteñan o contacto cos seus compañeiros, ademais de servir como un servizo de conciliación cada vez máis demandado polas familias de Frades”.