Comezan os recoñecementos médicos do Rio Natura Monbus Obradoiro

Os xogadores do Rio Natura Monbus Obradoiro comezaron a pasar hoxe mércores as probas médicas previas ao comezo dos adestramentos. Esta mañá foron Fran Cárdenas e Pepe Pozas os encargados de facelo, no Hospital Policlínico A Rosaleda, membro do Club de Empresas Obradoiro e responsable dos servizos médicos do club.

Os dous novos bases do equipo puxéronse a disposición do doutor José María Amaro Cendón para realizar probas como o electrocardiograma, a ecocardiografía e a de esforzo, así como unha analítica completa e unha exploración xeral.

Todos os xogadores do club irán realizando estes recoñecementos a medida que vaian chegando á cidade para poder sumarse logo aos adestramentos de pretemporada, que darán comezo o vindeiro martes 19.