COGAMI imparte en Lugo tres cursos de formación nos que se forman preto de 50 persoas con discapacidade

Nas instalacións que COGAMI ten en Lugo (rúa da Luz nº4, polígono de Fingoi) estanse a impartir tres cursos de formación para persoas con discapacidade en situación de desemprego, sendo estes de Operacións Auxiliares de Servizos Administrativos e Xerais de 448 horas de duración, Actividades Auxiliares en viveiros, xardíns e centros de xardinería con 348 horas de clases e Operacións de gravación e tratamento de datos e documentos que ten 458 horas de duración.

Cofinanciados polo Fondo Social Europeo e a Consellería de Emprego e Benestar a través da Dirección Xeral de Emprego e Formación, a cada un destes cursos asisten 15 persoas, contando o de Operacións Auxiliares e o de Viveiros con 7 mulleres e 8 homes, e o de Gravación de datos con 8 mulleres e 7 homes, procedendo a maioría do concello de Lugo, aínda que tamén algúns desprázanse dende os concellos de O Corgo, Vilalba, Castro de Rei e Vilalba.

Todas as persoas inscritas nesta acción formativa están apuntadas no servizo de intermediación laboral (SIL) que ten COGAMI en Lugo e todas teñen discapacidade ou unha incapacidade laboral recoñecida que lle impide desenvolver a profesión que desempeñaban. Outras, en cambio, fórmanse porque queren ampliar os coñecementos para poder inserirse canto antes no mercado laboral.

Os tres cursos comprenden tanto a impartición de clases teóricas presenciais como tamén un período de prácticas profesionais non laborais en empresas da zona.

A oferta de cursos AFD que imparte COGAMI este ano ascende a un total de 10, impartíndose, aparte dos tres de Lugo, outros en Santiago, Ferrol, A Coruña, Cabana de Bergantiños, Ourense, Mos e Pontevedra. Como finalidade teñen a de especializar ás persoas con discapacidade nunha profesión que lles permita inserirse no mercado laboral canto antes.