Cinco propostas innovadoras en saúde mental optan ao I Premio José Luís Muruzábal

O Consorcio As Mariñas xa ten candidatos para o I Premio José Luís Muruzábal, iniciativa que recoñecerá as experiencias innovadoras en materia de saúde mental. Este premio, creado polo Plan Coordinador de Servizos Sociais do ente supramunicipal ten como obxectivo poñer en valor o traballo en prol dos enfermos mentais e que lembrar a figura do fundador de APEM.

Tras finalizar o prazo de presentación de candidaturas o pasado 31 de xullo, optarán ao galardón un total de cinco propostas. Todas elas inciden na inserción sociolaboral a través de distintas estratexias: o emprego, teatro, formación, deporte… A Asociación do Trastorno de Personalidade de Galicia, Emprego Social, a Hospitalización a domicilio psiquiátrica, o Grupo “Lusco e Fusco” e a Asociación de Axuda ao Enfermo Mental A Mariña de Lugo, son quen están detrás destes interesantes proxectos.

Agora, o xurado do certame, de carácter multidisciplinar, estudiará as candidaturas presentadas e reunirase para emitir o seu fallo. Este xurado, presidido polo presidente do Consorcio As Mariñas, está integrado por un conxunto de profesionais das distintas áreas que interveñen neste campo: psicoloxía, traballo social, educación social, técnica de inserción social, mediciña, enfermería e pedagoxía.

O Consorcio prevé que o resultado do I Premio José Luís Muruzábal se poida coñecer a finais de setembro. A entrega do premio aos gañadores terá lugar no marco da Semana da Saúde Mental, iniciativa que o Consorcio celebra en outubro co obxectivo de sensibilizar sobre a necesidade de apoiar aos cidadáns con estas enfermidades. Dende o Plan Coordinador de Servizos Sociais do Consorcio, se destaca a variedade das propostas recibidas, todas elas enfocadas a mellorar a calidade de vida das persoas con enfermidade mental.

Na presentación do premio, o pasado mes de febreiro, destacouse a importante labor desenvolta por Muruzábal e APEM no ámbito das persoas con enfermidade mental en todos os concellos que integran o Consorcio As Mariñas.